ஜெயமோகனால் வங்கி முன் நின்று இறந்த ஒரு உயிரையாவது மீட்டுத் தர இயலுமா? : கவிஞர் தணிகை

ஜெயமோகனால் வங்கி முன் நின்று இறந்த ஒரு உயிரையாவது மீட்டுத் தர இயலுமா? : கவிஞர் தணிகை



பைபிளில் சொல்வார் மனிதரால் ஒரு மயிரை வெளுக்க வைக்கவோ கறுக்க வைக்கவோ முடியாது என்று...அதே போல நான் கேட்கிறேன் 500 ,1000 ரூபாய் பழைய நோட்டு செல்லாது என்ற அலையில் இழந்து போன ஒரு உயிரையாவது ஜெயமோகனால் மீட்டுத் தர முடியுமா? என்பதுதான்.

நல்ல எழுத்தாளர்தான் அவர் இந்தக் காலக் கட்டம் எழுதிய ஒரு எழுத்தாக்கத்தை படிக்க நேர்ந்தது. இவர் சொல்வதை எல்லாம் அப்படியே ஏற்றுக் கொண்டாலும் ஒவ்வொரு தனி மனிதனும் தமது உரிமையை உடமையை நாட்டின் வங்கி முந்தானையில் முடிந்து விட்டு அவிழ்க்க முடியவைல்லையே என க்யூவில் நின்று இரத்தம் கொதிப்படைந்து அதில் பல உயிர்கள் போயிருக்கின்றனவே, எத்தனையோ பேருக்கு உடல் நலம் குன்றிவிட்டதே அதை எல்லாம் இந்த எழுத்தாளரால் மீட்டுத் தர முடியுமா? என்பதுதான்.

அதனால் எல்லாம் சாகவில்லை, அவர்கள் உடல் நலம் அவ்வளவுதான், உரிய மருத்துவ சிகிச்சை செய்து கொள்ளாதது உரிய மருத்துவ சிகிச்சையை அவர்களுக்கு பெற்றுத் தராத குடும்பத்தின் தவறு என்கிறார்.ஒரு நாட்டில் தமது உடமையை எல்லாம் இழந்து விட்ட மனிதர்க்கு அந்த நாடுதானே உரிய மருத்துவமும் அளித்திட வேண்டும். எனவே இதுபோன்ற அரசின் செயல்பாடுதானே இதற்கு அடிப்படை...பிறகு ஏன் மனிதர்கள் அரசை கேட்க மாட்டார்கள், வசை பாட மாட்டார்கள்?



பெரும்பணக்காரர்கள் பெற்ற வங்கிக் கடனை திரும்பச் செலுத்தாதற்கு வக்காலத்து வாங்குகிறார். பெரிய வியாபாரத்தில் இதெல்லாம் நடக்கும், இப்படி பிசகுகள் ஏற்படுவது இயல்புதான், அவர்கள் வேண்டும் எனச் செய்யவில்லை என்கிறார். யார் வீட்டுப் பணத்தில் இவர்கள் வியாபார சரியா தவறா விளையாட்டு விளையாடு செல்வத்தை இழந்து கட்டாமல் இருக்கிறார்கள்? அவர்கள் அப்பன் வீட்டுப் பணத்தில்தானா? பொதுமக்கள் சேர்த்து வைத்திருக்கும் வங்கிக் கணக்கிலிருந்துதானே? மூன்று இலட்சம் பெறுமான நகையை வைத்துக் கொண்டு ஒன்னரை இலட்சம் கொடுத்து விட்டு வருடம் வருமுன்னே வாய்தா வந்து விட்டது என வாடிக்கையாளரை நெருக்கும் நெருக்குதலுக்கு அளவில்லை கீழ் மட்டத்தில் ஆனால் பல இலட்சம் கோடியை ஸ்வாகா செய்தும் அப்படியே சொகுசு வாழ்க்கை வாழ்வாரிடை எந்த மாற்றமும் இல்லையே....2018 -2019 வாக்கில் இருந்து ஆரம்பிக்கும் கணக்குகளுக்கு விவரம் தருமாம் ஸ்விஸ் வங்கி....அதற்குள் என்ன இருக்கப் போகிறது?

எங்குமே உரிய ரசீதுகள் வழங்கப் படுவதில்லை. எவரும் கேட்பதில்லை. அப்படியே ஒளித்து வைத்திருந்து வெள்ளையாக்கிக் கொள்கிறார் தமது கள்ளப்பணத்த எல்லாம் என்கிறார். உண்மைதான் பெரும்பாலும் இவர் சொல்வது எல்லாம் உண்மைதான். ஆனால் அதற்காக‌ இந்த அளவு பொருளாதார சீரழிவு நடக்கும் வண்ணம், சோற்றுக்கும், துணிக்கும், பயணத்துக்கும் காசு கிடைக்காமல் மனிதரை தமது பணத்தை நாட்டுக்கு முடிஞ்சி கொடுத்து விட்டு பிச்சை எடுக்க விட வேண்டுமா?

மகனும் இவரும் சென்றார்களாம், சுலபமாகவே  குறைந்த பட்ச நேரத்திலேயே கிடைத்து விட்டதாம். எனக்கும்கூட நிற்காமல் ஒரு பத்தாயிரம் கிடைத்துவிட்டதுதான் கையிலிருந்து சிறு தொகையை வங்கியில் கட்டி விட்டோம்தான்...ஆனால் நமது தனிப்பட்ட செல்வாக்கான ஒரு அனுபவத்தை மட்டுமே வைத்து பொதுக்கருத்தை எட்டுவது சரியான எழுத்தாளர்க்கு அழகல்லவே. நான் தினமும் பயணம் செய்கிறேன், செல்லும் இடம் எல்லாம் மேம்போக்காகப் பார்த்தாலும் வங்கி இருக்கும் இடத்தை பார்த்தாலே இங்கு வங்கி இருக்கிறது என டாஸ்மாக் அடையாளம் போல புரிந்து கொள்ள முடியுமளவு கூட்டம் நிறைய இருப்பதைக் காணமுடிவதை எப்படி இல்லை என மறுக்க முடியும்?

அல்லது எந்த ஏடிஎம்மிலும் பணம் இல்லை, வங்கியிலும் இல்லை, அல்லது  2000 மட்டும் பெற்றுக் கொள்ளுங்கள் எனக் கொடுத்த கதை எல்லாம் இல்லையா? வங்கிக் கணக்கையே முடித்துக் கொள்கிறோம் என்று சொன்ன ஒரு வாடிக்கையாளர்க்கு அப்படி முடித்தாலுமே உங்கள் பணத்தை கொஞ்சம் கொஞ்சமாக் பிற்காலத்தில்தான் கொடுக்க முடியும் எனச் சொன்ன சேதிகள் எல்லாம் இல்லையா?


ஒரு வீட்டின் எஜமானி சொல்கிறார்....ஒரு கெட்ட வார்த்தையை மொழிந்து விட்டு குடும்பம் என்று ஒன்று இருந்தால் தானே தெரியும்? என...காய் கறி கூட காலையில் சென்று வாங்க முடியவில்லையாம், மாலையில் சென்றால் கொஞ்சம் உயிர் வாழ முடியும் என்று தோன்றுகிறது என்கிறார்....விலைவாசி அப்படியாம்...சாப்பிடலையா பேருந்தில் எவருமே கூட்டமாகக் காணோம் என்கிறார் ஒரு நடத்துனர், பெங்களூர் பேருந்தில் ஒருவர் மட்டுமே இருக்க அத்தனை இருக்கையுமே காலியாக இருக்க பேருந்து செல்வதை நானே 5 ரோட்டு சாலையில் சேலத்தில் பார்க்க நேர்ந்தது.

இப்படி மக்களை முடக்கிப் போட்டிருக்கிறது. அடுத்து சில மாதங்களில் உணவு, தானியம், காய்கறி கூட கிடைக்குமோ என்னவோ...

மறுபடியும் பூக்கும் வரை
கவிஞர் தணிகை