கார்த்தியின் கைதி: சினிமா விமர்சனம்: கவிஞர் தணிகை.

கார்த்தியின் கைதி: சினிமா விமர்சனம்: கவிஞர் தணிகை.




குற்றவியல் கதைப் பின் புலத்தைக் கொண்டிருக்கிற படம். ஆரம்பத்தில் குடும்பத்தின் பெண்களை இப்படம் கவராது என நினைக்கும்போது டில்லியின் தனிப்பட்ட கதையும் அவரின் பெண் குழந்தை அனாதை ஆசிரமத்தில் வளர்ந்து வருவதும் அந்தக் குறையைப் போக்குகிறது. டில்லி சுமார் 10 ஆண்டுக்கும் மேலாக சிறையில் இருந்து நன்னடத்தையின் காரணமாக 4 ஆண்டுகளுக்கும் முன்பே வெளியே வரும் ஒரு கைதி தனது நேசமிகு மனைவியை இழந்து அவரது அடையாளமாக இருக்கும் தனது ஒரே வாரிசான இது வரை பார்க்காத பெண் குழந்தையை அனாதை ஆசிரமத்தில் காண காலைச் செல்லும் முன் அன்றைய இரவில் என்ன என்ன நடக்கிறது என ஓரிரவில் நடந்த கதையாக இந்த கைதி சினிமா நமக்குத் தரப்பட்டிருக்கிறது.

நல்ல முயற்சி. பாடல் ஏதும் இல்லை. படத்தை நீட்டிக்கும் முயற்சிகளும் ஏதும் பெரிதாக இல்லை. கொஞ்சம் ஜனரஞ்சகமாக இருக்கட்டுமே என்று சில காட்சிகள் மிகைப்படுத்தப்பட்டிருக்கின்றன சண்டைக்காட்சிகளில்.

மற்றபடி கார்த்தியின் நடிப்பு நாளுக்கு நாள் மெருகேறியபடி இருக்கிறது. இவர் தீரன் அதிகாரம் ஒன்னு படத்தில் காவல் துறை அதிகாரியாக வந்து நமையெல்லாம் படத்தில் ஒருங்கிணைய வைத்தவர் இதில் டில்லி என்னும் கைதியாக ஒரு லாரியின் ஓட்டுனராக வந்து வாழ்ந்து சினிமாவை நேரம் தெரியாமல் நகர வைத்து ஒரு த்ரில்லராக்கியிருக்கிறார் நெற்றி நிறைய திருநீறு பூசிக் கொண்டு நற்றுணையாவது நமச்சிவாயவே என பாடலுடன்.

எனக்கென்னவோ இவர் இவரது மூத்த சகோதரர் சூரியா, விஜய் போன்றோரை எல்லாம் நடிப்பில் பின்னுக்குத் தள்ளி விடுவார் போலும் நாளடைவில். இந்தப் படமே சிறிய பட்ஜெட் படமாக பிகிலை ஒப்பிடத் தோன்றினாலும் இதன் கதை , மற்ற நடிப்பு , எல்லா வாய்ப்புகளும் அந்தப் படத்தை இது மிஞ்சி இருக்கிறது. இது பிகில் தீபாவளி இல்லை கைதி தீபாவளிதான்.

இது சினிமாதான் என்ற போதிலும் பாத்திரங்களுடன் நடிக்கும் நடிகர்கள் ஒன்றிப்போவதால் நாமும் படத்தில் ஒன்ற முடிகிறது. நீண்ட இடைவெளிக்கும் பின் நரேன் போலீஸ் ஆபிசர் வேடத்தில் தனது பாங்குணர்ந்து செய்திருக்கிறார்.

 காமாட்சி ஒரு துணைப்பாத்திரத்தை செய்த தீனாவை இனி நிறைய படங்களில் காணலாம்.

அப்போதுதான் பதவி ஏற்க வரும் போலீஸ்காரராக வருபவர் நன்றாக வாய்ப்பு வழங்கப்பட்டு நன்றாகவே செய்திருக்கிறார் அவருடன் கல்லூரி மாணவர்களாக காவல்நிலையத்தில் மாட்டிக் கொள்ளும் இளைஞர்களும் கதை பல்வேரு கோணங்களில் பல்வேறு இடஙக்ளில் நடக்கும் சம்பவங்களுடன் நன்றாக எடிட்டிங் செய்யப்பட்டு நல்ல விறுவிறுப்பேற்றப்பட்டு பார்க்க ஒரு வேகத்தை ஏற்படுத்தி உள்ளது. எனவே லோகேஷ் கனகராஜ் மற்றும் குழுவினரைப் பாராட்டியே ஆகவேண்டும் கைதி 2 ஆம் பாகம் அதற்குள் எடுக்க இருப்பதாக உடனடியான செய்திகள் தெரிவிக்கின்றன. நல்ல தன்னம்பிக்கை. வாழ்த்துகள். நல்ல இளைஞர்கள் இது போல் நிறைய வந்து வழக்கமான டமுக்கடிப்பான் டியா டப்பான் மசாலா படங்களுக்கு மாற்றாகி நல்ல படத்தை தரவேண்டும் என வரவேற்கிறது மறுபடியும் பூக்கும் வலைப்பூவின் சார்பாக.

மோப்பம் பிடித்து காவல்துறைக்காக  செய்த  பிரியாணியை  கைதி கார்த்தி அதாங்க டில்லி ஒரு பக்கெட்டில் எடுத்து பெரிய தட்டில் போட்டு ஒரு பிடி பிடிப்பது போல ஒரு சாதாரண படத்தைப் பார்ப்போம் எனப் பார்க்க ஆரம்பித்த படத்தை நல்ல படம் பார்த்த உணர்வுடன் முடித்து வரலாம்.

இனி இந்தப் படத்தைப் பற்றி அதிகம் சொல்லப்போவதில்லை
நல்ல படங்க பார்க்க வேண்டிய படங்க... ஒரு முறை பாருங்க...

மறுபடியும் பூக்கும் வரை
கவிஞர் தணிகை.