நானும் கூட இந்துதான் பிறப்பால்: கவிஞர் தணிகை

நானும் கூட இந்துதான் பிறப்பால்: கவிஞர் தணிகை




காணபத்யம், கௌமாரம், சக்தேயம், சௌரம்,சைவம், வைணவம் என்ற சமயக் கூறுகளை உள்ளடக்கியதுதான் இந்து மதம்.  எல்லாவற்றிலும் நிறைய கதைகள். மக்கள் நம்பிக்கைகளாக. அதன் அடியில் இராமாயணம் மஹாபாரதம் என்னும் இதிகாசம் இரண்டும். என்னிடம் இவை மட்டுமல்ல  பைபிள், குரான், கீதை, யாவும் பல முறை படித்து முடிக்கப்பட்டு ஒரு வரையறை செயல்பாட்டுடன் உள்ளது. மேலும் பௌத்தம், ஜைனம், ஜென் , ஜி.கிருஷ்ணமூர்த்தி போன்ற எல்லா தத்துவங்களிலும் ஈடுபாடு உள்ளது அவை நன்மை பயக்குமெனில். இவை யாவற்றிலும் உள்ள நல்லதை எடுத்து செரித்து அதன் ரசத்தை உறிஞ்சிக் குடித்து வளர்ந்த செடி.

மதங்களைக் கடந்து பார்க்கத் தெரிந்திருந்தால் மட்டுமே மனிதம் முழுமை பெறும். அவர்களே மனிதர் என்று அழைக்கப்பட சரியான பொருள் பெறுவர்.

பிறப்பால் நானும் கூட ஒரு இந்து தான் என்றாலும் கலாம் ஐநாவில் உரையாற்றும்போது குறிப்பிட்டது போல  யாதும் ஊரே யாவரும் கேளிர் என்ற கணியன் பூங்குன்றனார் வழியே சிறந்தது என்று எண்ணி வாழ்வது எங்கள் வழி.

மூடத்தனமின்றி காசு செலவின்றி யாரும் எந்தக் கடவுளையும் வணங்கலாம் என்ற பெரியாரையும் பிடிக்கிறது

ரூபக்கடவுளும் பூசாரிகளும் இருக்கும் வரை இந்த உலகில் ஒழுக்கம் தோன்ற வழியே இல்லை என்ற விவேகானந்தரின் நெறியும் பிடிக்கிறது என ஏன் சொல்ல முடிகிறது எனில் அவை எவருக்கும் ஊறு விளைவிக்கவில்லை என்பதால்

கலாம், தெரஸா, காந்தி போன்ற மாமனிதர்களை எல்லாம் நாம் மதம் என்ற ஒரு அளவுகோல் வைத்து அதற்குள் அடைத்து விட முடியாது. அவர்கள் முழு மானிட சமுதாயத்துக்கே சொந்தம். ஏன் எனைப்போன்றோர் கூட எந்த மதம் சார்ந்தும் இயங்குவது இல்லை. ஆனால்  எல்லா மதத்தின் வழிகாட்டுதலும், நெறிகாட்டுதலும் உவமைகளும் சொற்றொடர்களும் எமது பேச்சின் புழக்கத்தில் அவ்வப்போது தலைகாட்டவே செய்யும் ஏன் எனில் அவை எம்முள் ஊறி இருப்பதால் .ஆனால் அவை காட்டும் முட்டாள் தனங்களையும், மூடத்தனங்களையும் யாம் ஒரு போதும் ஏற்பதில்லை.

விவேகானந்தர் சொல்வது போல உருவ வழிபாடு என்பதே மிகவும் கீழான நிலை...அதிலிருந்து தியான மார்க்கம் சென்று கடவுளை அறிந்து பட வேண்டும்.

எனவே நானும் கூட இந்துதான் பிறப்பால் ஆனால் எனக்கு கிறித்தவ நண்பர்கள் ஏராளம், முகமதிய நண்பர்களும் இருக்கிறார்கள். நான் அவர்களுக்கு உவப்பானவனாகவே இருக்கிறேன்.

ஜிட்டு கிருஷ்ணமூர்த்தி சொல்வது போல மனிதரை நாடு, மதம், மொழி, இனம், இவை போன்ற எதுவும் அடையாளப்படுத்தி விடக் கூடாது. மனிதர் எவராயிருந்தாலும் அவர் மனிதர்தாம். அவரின் உயிர் அரியதுதான். பாகிஸ்தான் மனிதர் இறப்பு  இந்தியாவில் வசிப்பதால் நமக்கு மகிழ்ச்சி அளிப்பதாக இருந்தால் அதுவும் தவறுதான்.

கியூபாவில் வாழும் ஒரு மனிதரின் துன்பம் அமெரிக்காவில் இன்பமாக மற்றொருவரால் கருதப்பட்டால் அது மனிதமல்ல...


இது போன்ற மேன்மையான கோட்பாட்டால் உலகும் மக்களும் மகிழ்வடைவார் குண்டு மழைக்குத் தேவையிருக்காது. குடிக்க நீர் கூட இல்லாமல் அரசியல் பேதங்களும், சாதி மத பேதங்களும் இங்கும் எங்கும் தலை விரித்தாட முடியாது.

இதையே மாமனிதராக வாழ்ந்தார் எல்லாம் சொன்னார்கள்... ஆனால் கீழான சிந்தை படைத்தார் தமது சுய நல மேன்மைக்காக தேவையில்லாத இவற்றை எல்லாம் உயிர்ப்பித்து உருவம் கொடுத்து மனித உயிர்களைக் கொத்துக் கொத்தாக எண்ணிக்கை அளவின்றி வாங்கி உலகை வன்முறைக் களமாக , இரத்தம் சிந்தும் அரங்கமாக மாற்றிக் கொண்டிருக்கிறார்கள்.

அது போன்ற நபர்கள் எல்லாம் சமுதாய பொது வாழ்வு வெளியிலிருந்தே அப்புறப்படுத்தப் பட வேண்டியவர்கள்.

சந்திரசேகர சங்கராச்சாரியார் அவர்கள் தமிழ் மொழி நீச மொழி என்று சொன்னதாக  வரலாறு உண்டு. மொழி கடவுளை அடைய ஒரு ஊடகம் எனில் அதிலும் சமஸ்கிருதம் போன்ற வட மொழி மட்டுமே அதற்கு தகுதியுடையது எனில் அதுவும் எவர்க்குமே புரிபடாமல் அவற்றை மந்திர தந்திர வழிகள் என்று ஏமாற்றும் வழிகள் எனில் கடவுளும் கூட ஒரு ஏமாற்றுதான் என்றே கருத முடியும்.

புறம் கட உள் பார்க்க‌
புறம் கட  கடவுள் பார்க்க‌

இராமலிங்க வள்ளலார் போன்ற மகான்கள் அவதரித்த நாட்டில் இப்படிப்பட்ட பெரு ஓலம். ஒர் மனிதர்க்கு பேசவும் , எழுதவும் பேச்சுரிமை, எழுத்துரிமை ஆகியவை சட்டபூர்வமாகவே உண்டு. அதற்காக அவரை நிந்திப்பதும், அவர் மேல் வழக்கு தொடுப்பதும், அவரது நாக்கை அறுப்பதாக சொல்வதும் இவை எல்லாம் மக்களை ஒரு கொந்தளிப்பு நிலைக்கு கொண்டு செல்லும் முயற்சியாகும்




இராமலிங்க வள்ளலாரே முதலில் சென்னையில் உள்ள கந்தகோட்டத்துப் பெருமான் முருகனை வணங்கிப் பாடல் புனைந்திருக்கிறார்... ஆனால் இறுதியில் பக்குவத்தில் அருட் பெருஞ் சோதி, தனிப்பெருங்கருணை என்கிறார் மக்கள் பெரும்பசி தீர்த்தல் பெரும் கடைத்தேற வழி என்கிறார்.

இந்தியா மகாத்மா கோட்ஸே, ராஜிவ் தனு பிரபாகரன், இந்திரா பியந்த் சிங் பொற்கோவில் இப்படி ஒருவரைப் பற்றிச் சொல்லும்போது அதன் பின் வரும் சில பெயர்களும் இருக்கத்தான் செய்யும் அதற்காக அதைப்பற்றி பேசுவது எழுதுவது கூடாது என்பதெல்லாம் வன்முறையைக் கிளப்பும் ஆதிக்க வெறிகள். அவற்றுக்கு மக்களும் நாடும் நெறிகளும் நீதியும் இரையாகிடக் கூடாது



முதலில் மக்களின் குடிநீர்த் தேவையை நிறைவு செய்யுங்கள் அதன் பின் நீங்கள்  எந்த மதம், கட்சி, ஆட்சி, அதிகாரம் என்று அடித்துக் கொள்ளலாம்

கமல்ஹாசன் முன் ஜாமின் கேட்டு விண்ணப்பித்துவிட்டு மறுபடியும் அது சரித்திரப்பூர்வமான உண்மைதான் என பிரச்சாரத்தில் இறங்கி இருப்பது அவரைப்பொருத்தவரையிலும், அவர்கள் மக்கள் நீதி மையக் கட்சியைப் பொறுத்தவரையிலும் ஒரு ஆரோக்யமான முயற்சியே.

மறுபடியும் பூக்கும் வரை
கவிஞர் தணிகை.

உள்ளம் பெருங் கோயில் ஊனுடம்பு ஆலயம்
வள்ளல் பிரானார்க்கு வாயதுவே கோபுர வாசல்
தெள்ளத் தெளிந்தார்க்கு சீவனே சிவலிங்கம்
கள்ளப் புலனைந்தும் காளா மணி விளக்கே!
 திருமூலம்