மீமாஞ்சனைக் காணவில்லை: கவிஞர் தணிகை

 மீமாஞ்சனைக் காணவில்லை: கவிஞர் தணிகை

மீமாஞ்சகன் என்ற பேரைக் கேள்விப்பட்டிருக்கிறீர்களா? கடவுள் மறுப்பு சிந்தனையாளர், ஒவ்வொருவர் செய்யும் செயலே அவரவர் விதியை தீர்மானிக்கும், மறை யாவும் பழையவை என்ற பொருள் படும் பெயர் அது. அப்பேர்ப்பட்ட பேரைக் கொண்டிருக்கும் எனது நண்பர் ஒருவரை கடந்த சில நாட்களுக்கும் முன்பு அந்த ஊருக்கு செல்லும் போது கேட்டேன்.

 அவர் மறைந்து 3 ஆண்டுக்கும் மேல் ஆகிறது என்றார்கள் அங்கிருந்த பெண்டிர்.

 வயது குறைவாகத் தானே இருக்கும்? என்ற எனக்கு

வயதைப் பார்த்தா இப்போதெல்லாம் சாவு வருகிறது...என்றார்கள்

அவரை மீன் என்றும் அவரது சகோதரரை மான்( அதியமான் என்று நினைவு) என்றும் பள்ளிக்கூடக் காலத்தில் இருந்தே அழைப்பது வழக்கம். சகோதரர் ஒரு உயரத் தாண்டும் விளையாட்டு சாம்பியன். அவர் எங்கோ ரெயில்வே பெங்களூரில் செட்டில் ஆகிவிட. 

மீன் கேபிள் நடத்தி வந்து கொண்டிருந்தார்.டி.வி , கணினி என்று மின்பொருள் சாதனம் எல்லாவற்றையும் விட்டு வைக்க மாட்டார் சரி செய்து கொடுக்கும் ஆற்றல் பெற்றவர்... ஏதோ ஒரு தியான அமைப்பிலும் தீவிரமாக செயல் பட்டு வந்தார். எனக்கும் அவருக்கும் நெருக்கம் ஏற்பட்டது அவர் எனக்காக எனது மலைவாழ் மக்கள் மேம்பாட்டுத் திட்டம் பற்றி ஒரு வீடியோ செய்து கொடுத்தது முதல்.

அப்பேர்ப்பட்ட பேரை வைத்த குடும்பம் பார்க்க வீட்டுக்கு செல்ல ஆரம்பித்த சில முறை பல முறை அவர் வீடு சென்ற நினைவு உண்டு...அவர் தந்தை, தாய் இருவருமே அரிய மனிதர்களாகவே இருந்தார். ஆனால் இப்போது எவருமே இல்லை.

காலம் எல்லாவற்றையும் புரட்டிப் போட்டிருந்தது. எப்பேர்ப்பட்ட ஊர் அது...சுமார் 3000 குடும்பங்கள் அந்த இங்கிலாந்து சார்ந்த பியர்ட்செல் என்ற  மில் சார்ந்து வாழ்ந்து வந்த இடம் அது அதற்கான மனமகிழ் மன்றங்கள், கூட்டுறவு பண்டக சாலை,ரேடியோ கிரவுண்ட் , சினிமா போடும் வெட்ட வெளி, தொழிலாளர்க்கான மருத்துவ மனை,எல்லாம் மாறி விட்டது.

எனது சகோதர நண்பர் கூட ஒரு முறை பாத்திமா பீவி என்ற ஒரு  தையல் ஆசிரியையை போய்ப் பாருங்கள் என்று நேரு யுவக் கேந்திரா வழியாக கேட்டுக் கொண்டதற்கிணங்க அந்த அம்மையாரையும் அவர் தையல் அலகையும் சென்று பார்த்தேன்....அப்போதெல்லாம் எனது சகோதர நண்பர் சொல் செயலாக்க நிறைய பேர் அவருடன் அன்பால் அல்லது ஏதோ  ஒரு பிணைப்பால் அவர் அரசு அலுவலர் என்ற வரையறையையும் மீறி தொடர்பில் இருந்தனர்.

எதையோ சொல்ல வந்து எங்கோ சென்று விட்டேன்...

மீமாஞ்சன் சிரித்து சிரித்து புன்னகை புரிந்து புரிந்து என்னுடன் பல வகையான கருத்து செறிந்த சொற்களை கலந்து பேசி விவாதித்துப் பேசுமளவு சிறந்த நண்பர். திருமணமே செய்து கொள்ள வில்லை...உருவம் இருக்கிறது உயிர் இல்லையே...

நேற்று கூட நூறு வயது கடந்த எனது துணைவியாரின் தாய் வழிப் பாட்டி மறைந்தார்... அப்படி கூட மரணத்துக்காக காத்திருந்து செல்வதை விட பூ உதிர்வது போல, பழுத்துக் காய்ந்த இலை உதிர்வது போல, மிக எளிதானதாக இருக்க வேண்டும் மரணம், அது உறங்கும் போது மிக எளிதானதாக இருக்க வேண்டும், மருத்துவ மனைகளில் இருக்கக் கூடாது என்று விழைவார்கள் அறிந்தார்.

எல்லோருக்கும் தெரிந்த ஒரு மறுக்க முடியாத மறக்கக் கூடாத உண்மை

அது எல்லா உயிர்க்கும் மரணம் என்பது ஒரு நாள் தவறாது இருக்கும் நிச்சயமாக என்பது...

அது பற்றி ஏன் சிந்திக்க மறுக்க வேண்டும்...பயமின்றி சந்திக்க வேண்டும் ஒரு சுதந்திரப் போராட்ட வீரர் போல... 

அந்த நினைவுடன் இருக்கும் போது மனிதம் சிறக்கும்

மறுபடியும் பூக்கும் வரை

கவிஞர் தணிகை.

( என்னடா காலையிலேயே இப்படிப் பட்ட ஒரு பதிவு என்று நினைக்க வேண்டாம். உண்மைக்கு கால நேரம் கிடையாது)

சொல்லாமல் இருக்க முடியவில்லை: கவிஞர் தணிகை

 சொல்லாமல் இருக்க முடியவில்லை: கவிஞர் தணிகை

எங்கள் ஊரில் இருந்து தாரமங்களம் போக வேண்டி நேர்கையில் எனக்கு அந்த காலத்தில் என்.டி பேருந்து நினைவு வரும்படி நமது அரசுப் பேருந்து கிடைத்தது. அது மல்லப்பனூர் பிரிவு சாலை வழியே பழங்கோட்டை, விருதாசம்பட்டி,முத்தம்பட்டி, ஓலைப் பட்டி,குட்டப்பட்டி, தொளசம்பட்டி, அமரக் குந்தி வழியாக தாரமங்களம் போய் சேர்கிறது.

எல்லாம் நிறைய பட்டிகள். ஒரு வகையில் மழையால் பசுமைதான். இன்னோரு வகையில் இன்னும் வறுமைப் பிணி இருக்கும் நிலைதான். எல்லாவற்றையும் விட தமிழக அரசை இலவச பேருந்து மகளிர்க்கு விட்டதன் மாபெரும் காரியத்தை பாரட்டியே ஆக வேண்டும் எனத் தோன்றுமளவு எத்தனை வகையான பயணியர், எத்தனை வகையான பெண்டிர், முதியவர், நடக்க இயலாதார், கீழ் நிலை மருத்துவப் பணியாளர்கள், கிராமத்தார், படிக்காதார், படித்தார் இப்படி பலரும் பலன் அடைந்து வருவதைப் பார்க்கும் போது  இந்தக் குறிப்பிட்ட செயலைப் பொறுத்த வரை அரசின் செயல் மக்கள் நலம் சார்ந்ததாக இருப்பதை சொல்லாமல் இருக்க முடியவில்லை

எல்லா இடங்களிலும் எல்லா மக்களுக்கும் பேருந்தை ஓட்டுனர் நிறுத்தியே அழைத்துச் சென்றார். அத்துடன் இந்த பயணிகள் அனைவர்க்கும் இலவச பேருந்து அனுமதிச் சீட்டு என்ற ஒன்று வழங்கப் பட்டு கணக்கு வைக்கப் படுவது என்பதும் பெரிய நிகழ்வுதான்....

அரசின் ஏற்ற இறக்கமான செயல்பாடுகளில் இது ஒரு காமராசர், எம்.ஜி.ஆர், போன்று ஸ்டாலின் என்ற பேர் நிற்கும் செயல்பாடுதான்.

இது போன்ற முக்கியமான துறைகளில், கல்வி நிலையங்கள், போக்குவரத்து,மருத்துவம் போன்ற இன்ன பிற சேவைத் துறைகளில் தனியார் மயமாவது நின்று பொது உடமை அல்லது அரசின் கை வசமே கூட யாவும் இருப்பது சிறந்ததுதான். ஆனால் அவை எல்லாம் நடக்குமா?

மறுபடியும் பூக்கும் வரை

கவிஞர் தணிகை

இப்படியும் வெகு சிலர்: கவிஞர் தணிகை

 நன்றி : தினமணி 12.07.2022

R. Bindu Minister of Higher Education Kerala State Government.

ஆர். பிந்து என்ற கேரள மாநிலத்தின் உயர் கல்வித் துறை அமைச்சர்  27 வயதான விவேக் பிரபாகர் என்ற இளைஞரின் சிறு நீரக மாற்று அறுவை சிகிச்சையின் முதல் நன்கொடையாக தனது தங்க வளையலைக் கழற்றிக் கொடுத்துள்ளார் என்பது நான் காலையில் கண்ட ஒரு நல்ல செய்தி. பகிர்ந்து கொள்வதில் மகிழ்கிறேன்.

மறுபடியும் பூக்கும் வரை

கவிஞர் தணிகை.

இப்படியும் எங்கோ ஒரு சிலர்: கவிஞர் தணிகை

 நன்றி: தினமலர் 11.07.2022

முசாபர்பூர்: பீஹார் கல்லூரி ஆசிரியர் ஒருவர் மாணவர்களுக்கு சரியாக பாடம் எடுக்காமல் சம்பளம் வாங்க தன் மனசாட்சி அனுமதிக்கவில்லை எனக்கூறி தன்னுடைய 33 மாத சம்பளமான ரூ.24 லட்சத்தை திருப்பி அளித்துள்ளார்.

வேலை பார்த்துவரும் பலரும் சம்பளம் வந்தால் போதும் என்ற நிலையில் இருப்பர். வெகு சிலரே, வாங்கும் சம்பளத்திற்கு நேர்மையாகவும், நியாயமாகவும் பணியாற்றுவர். அந்த வகையில் பீஹாரில் ஆசிரியர் ஒருவர், தான் சரியாக பாடம் எடுக்கவில்லை எனக்கூறி தனது மூன்று ஆண்டு சம்பளத்தை திருப்பி அளித்துள்ளார். பீஹார் மாநிலம் முசாபர்பூரில் உள்ள ஒரு கல்லூரியில் ஹிந்தி உதவிப் பேராசிரியராக கடந்த 2019 செப்டம்பர் முதல் பணியாற்றியவர் லாலன் குமார். இக்கல்லூரி, பி.ஆர்.அம்பேத்கர் பீஹார் பல்கலைக்கழகத்தின் கீழ் செயல்பட்டு வருகிறது. லாலன் குமார் பணியில் சேர்ந்த நாள் முதல் இதுவரை கிட்டத்தட்ட ரூ.24 லட்சம் சம்பளமாக பல்கலைக்கழகத்திடம் இருந்து பெற்றுள்ளார்.

இந்த நிலையில் அவர் தான் பெற்ற சம்பளமான ரூ.23,82,228க்கான காசோலையை பல்கலைக்கழக துணை வேந்தருக்கு கடிதத்துடன் திருப்பி அளித்துள்ளார். இது தொடர்பாக லாலன் குமார் கூறியதாவது: மாணவர்களுக்கு சரியாக பாடம் எதுவும் எடுக்காமல் சம்பளம் வாங்க என் மனசாட்சி அனுமதிக்கவில்லை. கொரோனா காலக்கட்டத்தில் ஆன்லைன் வகுப்புகளின்போதும், ஹிந்தி வகுப்புகளுக்கு ஒரு சில மாணவர்கள் மட்டுமே வந்தனர். என்னுடைய எண்ணம் சிறப்பாக இருந்த போதிலும், என்னால் என் கடமைகளை சரிவர ஆற்ற முடியவில்லை. இந்த சூழ்நிலையில், சம்பளத்தை ஏற்றுக்கொள்வது தார்மீக ரீதியாக சரியாக இருக்காது. இவ்வாறு அவர் கூறியுள்ளார். மனசாட்சி அனுமதிக்காமல் தன் சம்பளத்தை திருப்பி அளித்த ஆசிரியருக்கு பலரும் பாராட்டு தெரிவித்து வருகின்றனர்.

மறுபடியும் பூக்கும் வரை

கவிஞர் தணிகை

திரௌபதி முர்மு இந்தியக் குடியரசுத் தலைவர் வேட்பாளர்: கவிஞர் தணிகை

 திரௌபதி முர்மு இந்தியக் குடியரசுத் தலைவர் வேட்பாளர்: கவிஞர் தணிகை

கலாம் கலாம் என்று ஒரு நதி நீர் இணைப்புக் கவிதையில் நிறைய கலாம்கள் வரும்படி இராமமூர்த்தி நகர் நிம்ஸ் எனப்படும் நியூ இண்டியா மெட்ரிக் பள்ளியில் கவிதை பொழிந்தேன்...இப்போது இல்லாத பொறியாளர் தெய்வத் திரு மணிகூட அதற்காக எனை மேடையிலேயே முத்தமிட்டார். அவ்வளவு நல்ல கவிதை அது...அதன் மறு செய்தி பார்வையில் சென்னையில் ஒரு கல்லூரிக்கு வகுப்பு எடுக்க வந்திருந்த கலாமுக்கு இஜட் ப்ளஸ் பாதுகாப்பு என்றும் அப்போது பிரதமராக இருந்த வாஜ்பேயி கலாமை குடியரசுத் தலைவராக முன் மொழிந்ததாக செய்தி.

நமக்கெல்லாம் அளவிலா மகிழ்வு. அப்போதும் ஒரு மூத்த நண்பர் இல்லை இது சரியில்லை, துணைக் குடியரசுத் தலைவர் என்று ஆன பின் தாம் நேரடியாக குடியரசுத் தலைவர் என்று நியமிக்கப் பட்டிருக்க வேண்டும் என்று கூறி இருந்தார்.

காங்கிரஸ் வி.வி. கிரி போன்றோர் குடியரசுத் தலைவராக தேர்வின் போது சில சொதப்பல் வேலைகளை அந்தக் காலத்தில் இந்திரா பிரதமராக இருந்தபோது செய்த‌தாக வரலாற்றுப் பதிவுகள் உள்ளன.

எனைப் பொறுத்தவரை பா.ஜ.க‌ இது வரை நியமித்த குடியரசுத் தலைவர் என்ற வரையில் அந்தப் பொறுப்பை மிகத் திறமையாக கையாள்கிறது என்றே நினைக்கிறேன். கலாம், பிரணாப் முகர்ஜிக்கு மாற்றான நிலை வரும்போதே திரௌபதி முர்மு பெயர் பரிசீலனை செய்யும் நிலையில் இருந்ததாக செய்திகள் இருக்கின்றன. ஆனால் மாண்புமிகு இராம் நாத் கோவிந்த் தேர்வு செய்யப் பட்டார்.

இப்போது மாண்பு மிகு திருமதி. திரௌபதி முர்முவுக்கு இந்த வாய்ப்பு.

இவர் நமது தமிழகத்தில் இருந்து ஆளுனராக வலம் வரும் தமிழிசையை விட வயதில் மூத்தவர், மேலும் மிகவும் பின் தங்கிய பழங்குடியினத்தில் இருந்து வந்திருக்கிறார். எனவே தமிழிசை பெயரை இவரது பெயர் முந்தி இருக்கிறது. தமிழிசை என்னதான் ஆனாலும் அரசியல் முன்னிலையில் இருந்த குடும்பம் மேலும் மருத்துவக் குடும்பம். ஆனால் திரௌபதி முர்மு சாந்தல் (சாந்தால்) என்னும் பழங்குடி அல்லது ஆதிவாசி மரபை சார்ந்திருந்ததும் ஒரிஸ்ஸாவின் மயூர் பஞ்ச் மாவட்டத்தில் இருந்து பிறந்தவர் என்பதும் ஒரு மிகப் பெரும் வாய்ப்பாகி விட்டது.

துணைக் குடியரசுத் தலைவர் வெங்கைய்ய நாயுடுவின் பேரும் அடிபட்டது...ஆனால் அது நடக்கவில்லை.

மகன்கள் , கணவர் இல்லாத திரௌபதி முர்மு ஒரு பட்டதாரி, பேரூராட்சி கவுன்சிலராக இருந்து துணைப் பஞ்சாயத்து தலைவர், சட்டமன்றப் பிரதி நிதியாக‌  இரு முறை தேர்வு செய்யப் பட்டு, மாநில மந்திரியாகி அதன் பின் ஜார்கண்ட் ஆளுனராகி இருந்து இப்போது இந்த நிலைக்கு உயர்ந்திருக்கிறார்.பா.ஜ.கவில் மாநில அளவில் முக்கிய பொறுப்பு மற்றும் நல்ல சட்டமன்றப் பிரதிநிதி போன்ற விருதுகளும் பெற்றுள்ளார்.ரெய்ரங்பூர் என்ற அரவிந்தாஸ்மரத்தில் ஊதியமின்றி கல்வி கற்பித்திருக்கிறார் சேவை செய்திருக்கிறார்., மேலும் 1979 முதல் 1983 வரை ஒரிஸ்ஸா மாநில அரசில் இளநிலை உதவியாளராகவும் பணி புரிந்திருக்கிறார்.

எனக்கு தனிப்பட்ட முறையில் ஒரு திருப்தி, மகிழ்வு. ஏன் எனில் நான் ஒரிஸ்ஸா , ம.பி, கேரளா, தமிழ்நாடு, கர்நாடகா போன்ற இந்தியாவின் பல மாநிலங்களிலும் ஆதிவாசி பழங்குடியினர்க்கா என்னால் முடிந்த சேவை செய்தவன் அதற்காக அங்கெல்லாம் சென்று வாழ்ந்து வந்தவன். எனவே அவர்கள் எல்லாம் எவ்வளவு கடினமாக முயன்று மேல் எழும்ப வேண்டும் என்பது எனக்குத் தெரியும்.

நான் ஒரிஸ்ஸாவில் 1985  என நினைக்கிறேன் கோராபுட் மாவட்டத்தில் பணிச் சேவை செய்ய , எனது நண்பர்கள் புல்பாணி, மயூர்பஞ்ச் ஆகியவற்றில் இருந்தனர். அப்போது ஒரிஸ்ஸா சத்தீஸ்கர் எனப் பிரியாமல் பிஹார் ஜார்கண்ட் எனப் பிரியாமலும் இருந்த காலம்.

கோயா, கோன்ட்ஸ், சாந்தல் தோடா, தொதுவா, படுகா, பனையா, இருளா இப்படி இந்தியாவில் சுமார் 480 பழங்குடியின மரபுகள் உண்டு. அதில் தனி மொழிகளே இருக்கும் பெரும் பிரிவுகளும் உண்டு. இந்த சாந்தல் இனப் பழங்குடியினத்தார் ஒரிஸ்ஸா, ஜார்கண்ட், பீஹார், மேற்கு வங்கம்,சத்தீஸ்கர், திரிபுரா ஆகிய மாநிலங்களிலும் வாழ்ந்து வருகின்றனர்.

இவர்களின் பிரதிநிதியாக படித்து வளர்ந்தவர் இந்தியக் குடியரசுத் தலைவராக வாய்ப்பு பெற்றவராகி இருக்கும்  திரௌபதி முர்முவுக்கு இந்த நேரம் கட்சி பேதமின்றி பாகுபாடின்றி அனைவரும் ஆதரித்து அதுவும் தேர்வு செய்வது நல்லது அதிலும் ஒரு மனதாக ஆதரிப்பது இந்தியாவின் மேன்மையை பறைசாற்றும்.

 சுஷீல் குமார் ஷிண்டே கூட காங்கிரஸ் வேட்பாளராக களமிறங்கினார் ஒருமுறை அவரும் பின் தங்கிய வகுப்பிலிருந்து மிகவும் முன்னேற்றம் பெற்றவர் அவரை எமது நண்பர் சுபாஷ்சந்திரன் தமது நிழலற்ற பயணம் என்ற புத்தகம் வழியே பறை சாற்றி இருந்தார். அவருக்கு வாய்ப்பு கிடைக்கவில்லை.

குடியரசுத் தலைவர் என்ன ரப்பர் ஸ்டாம்ப் தானே யார் இருந்தால் என்ன பிரதிபா பாடீல் சினிமா பார்ப்பதற்கென்றே ராஸ்ட்ரபதி பவனத்தில் தொழில் நுட்ப வல்லமையுடன் தியேட்டர் எல்லாம் ஏற்படுத்திக் கொண்டு( செய்தியாக படித்ததுதான்) மக்கள் பணத்தை பாழாக்கவில்லையா என்றெல்லாம் கேள்விகளும் எழாமல் இல்லை...

கலாம் மக்கள் குடியரசுத் தலைவராக உயர்ந்தார். தமிழர்களுக்கென்று ஒரு தனி இடம் ஏற்படுத்தி இருந்தார்.

இந்த அம்மா கூட பழங்குடியனர்க்கு ஒரு மிகச் சிறந்த வாழ் நிலை நினைவலைகளை ஏற்படுத்தி தர வாய்ப்புகள் உள்ளன‌

மறுபடியும் பூக்கும் வரை

கவிஞர் தணிகை.

பி.கு: இதைப் படிக்கும் எமது அன்பர்கள் அவரவரது பதில் கருத்துகளை

மறுபடியும் பூக்கும் என்ற வலைப் பூவில் நேரடியாக வழங்கலாம்.

பாலகிருஷ்ணன் குழுவினர்: கவிஞர் தணிகை

 பாலகிருஷ்ணன் குழுவினர்: கவிஞர் தணிகை

கடவுளும் கழிப்பறை சுத்திகரிப்பு தொழிலாளியும் ஒரே நேரத்தில் தம் முன் வந்தால் முதலில் சுத்திகரிப்பு தொழிலாளியை வணங்குவேன் அவர் தம் கரங்களுக்கு முத்தமிடுவேன் என்று சொன்னாராம் அன்னை தெரஸா

அது போல நான் 6 ஆண்டுகள் பணிச்சேவை செய்த கல்லூரியில் முதலில் ஆரம்ப கட்டத்தில் சரியான நபர்களே வாய்க்கவில்லை. ஏன் எனில் கல்லூரிக்கு வரும் பொதுமக்களாகிய பல் மருத்துவத்துக்கு வரும் வயது வித்தியாச வேறுபாடுள்ள பல்வேறுபட்ட நோயாளிகள், பயன்படுத்தும் நிலை என்பதால் முன் இருந்த எவருமே அதை ஈடுகட்டி சிறப்பாக அவரவரது பணிகளைச் செய்ய வில்லை செய்ய முடியவில்லை . இது பெரிய பிரச்சனையாகவே இருந்தது ஆரம்பக் கட்டக் காலங்களில். (குழந்தைகள், சிறுவர்கள்,ஆண்கள் , பெண்கள், வயது முதிர்ந்தோர் , ஊனமுற்றோர் இப்படி எல்லா வகையானவர்களும் உண்டு) அந்த பொதுக்கழிப்பறைகளின் தூய்மை பொறுப்பு மேற்பார்வை வேறு என்னிடம் விடப்பட்டிருந்தது பொது உறவு அலுவலர் என்ற முறையில் எல்லா பணிகளிலும் மூக்கை நுழைக்கும் பொறுப்பு என்னிடம் இருந்தது. அதற்கு தலைமை எனக்கு வசதி வாய்ப்புகளை பொறுப்புகளை வழங்கி சுதந்திரமான செயல்படும் நபராக வைத்திருந்தது.

அதில் எனக்கு சீராகிய ஒரு பணி பற்றி நிறைவு. அது சில ஆண்டுகளுக்கும் முன் பாலகிருஷ்ணன், செல்வராஜ்,சதீஷ், தங்க பொண்ணு என்ற நால்வர் குழுவாக‌ வந்து அந்த பணியில் இணைந்தனர். அனைவருமே தங்கள் பணியில் கவனம் செலுத்தினர். கழிவறை சுத்திகரிப்பு பணியாளர் என்று சொல்லாதீர்கள், ஹவுஸ்கீப்பிங் எனச் சொல்லுங்கள் என தங்களது விடுமுறை விண்ணப்பங்கள் மற்றும் என்னிடம் வந்து எழுதிச் செல்லும் எல்லா விண்ணப்பங்களிலும் குறிப்பிடச் சொன்னார்கள் இந்தக் குழுவினர்.

மேலும் கல்லூரியில் இருக்கும் எல்லாக் கழிவறை தூய்மை மட்டுமல்ல, வேறு பணிகள் ஏதும் சொன்னாலும் கல்லூரி அவர்களை ஓய்வு நேரத்தில் பயன்படுத்திக் கொள்ள இவர்கள் பயன்பட்டனர். அதிலும் முக்கியமாக பாலகிருஷ்ணன் பற்றி சொல்லியே ஆக வேண்டும்.

ஏன் எனில் யானை போன்ற தோற்றம்,அந்தளவு உடல் பலமுள்ளவரும் கூட. ஆடி அசைந்து செல்லும் இரட்டை நாடி சரீரம் (உடல் வாகு) . பெரும் பாரமான பொருள்களை இடம் நகர்த்த இவரை அடிக்கடி கல்லூரிப் பணிக்காக பயன்படுத்துவது வழக்கம். சலிக்காமல் செய்வார்.

மேலும் ஏதாவது ஒரு பணியை குறிப்பிட்டு சொல்லி விட்டால் அதைச் செய்த பின் வந்து செய்து முடித்ததைக் குறிப்பிட்டு நம்மிடன் சொல்லி விடுவார்.

என்னிடம் மிக மரியாதையுடன் அனைவரும் நடந்து கொள்வார் என்ற போதிலும் இந்த பாலகிருஷ்ணன் போன்றவர்கள் மிகவும் நேசத்துடன் நடந்து கொண்டது குறிப்பிடத்தக்கது.

அவரவர் ஏற்றுக் கொள்ளும்  செயல்பணிகளில் செயல்படுவதில் ஒரு ஒழுங்கமைவு வந்து விட்டாலே யாவும் சிறக்கும் சீராகும் என்பதற்கு பாலகிருஷ்ணன் குழுவினர் ஒரு சான்று...

பொது உடமை கொள்கை உள்ள நாடுகளில் எல்லாம் இது போன்ற உடல் சார்ந்த பணிகளும், தூய்மை பணியாளர்களுக்கும் முன்னுரிமை, ஊதியத்தில் மற்றவர்களை விட அதிக சிறப்பு என்று கேள்விப்பட்டதுண்டு...

பி.கு: தங்களது வீடுகளில் அவரவர் இந்தப் பணிகளை வளர்ந்து வரும் இளம் சமுதாயத்தினர்க்கு  கற்றுக் கொடுப்பதில் கற்றுக் கொள்வதில் தவறு ஏதுமில்லை, செய்யும் தொழிலில் இழுக்கு என்பது ஏதுமில்லை. அவரவர் இடங்களை அவரவர் தூய்மை செய்து கொள்ளாமல் அடுத்தவரை அதைச் செய்ய நிர்பந்திப்பதும் கூட மனித குல வரலாற்றுக்கு சிறப்பு சேர்க்காத செயல்பாடுதான். சீனா ஜப்பான் போன்ற மிக முன்னேறிய நாடுகளில் இது போன்ற பணிகளில் அதிக கவனத்தை மக்களும், நாடும் அதன் அரசும் கொண்டிருப்பதாக கட்டியம் கூறும் சான்றுகள் உள்ளன.

மறுபடியும் பூக்கும் வரை

கவிஞர் தணிகை

பி.கு: தமிழில் கொடிகட்டிப் பறந்த நடிகை இலட்சுமியின் மகள் ஐஸ்வர்யா ஒரு பேட்டியில் தமது ஏழ்மை தீர்க்க(Toilet Cleaning) அந்தப் பணியச் செய்யக் கூட விரும்புகிறேன் சரியான ஊதியம் இருந்தால் என்று சில நாட்களுக்கும் முன் தான் தமது நிலை பற்றி கொடுத்த செய்தியை காண நேர்ந்தது தொலைக்காட்சி தொடர்தாம் தமக்கு முக்கியம் என்றும் சினிமா சோறு போடவில்லை, இப்போது சோப் மற்றும் தூய்மை பொருட்களை வீடு வீடாக விற்று வருவதாகம் படிக்க நேர்ந்தது.

பாஷா: கவிஞர் தணிகை

 பாஷா: கவிஞர் தணிகை

ஒரு தடவை சொன்னா நூறு தடவை சொன்ன மாதிரி

என்ற அந்த பாஷா பற்றியது அல்ல இது...

ஆனாலும் அது போல இந்த பாஷாவுக்கும் நிறைய ப்ளாஸ்பேக் எல்லாம் உண்டு

எனவே அதை வைத்தே கிண்டலும் கேலியுமாக அடிக்கடி பேசிக் கொள்வோம்...

 கல்லூரி பணிக்காலத்தில் மற்றொரு நண்பர் அல்லது தோழர் பாஷா.பாஷா என்றால் சக்கரவர்த்தி...இந்த பாஷாவின் முழுப் பெயர் மறந்து விட்டது. இப்படியே அழைத்து விளித்து கூப்பிட்டு பழக்கமாகி விட்டது.முழுப்பெயரைக் கூட கேட்டுவிட்டு இந்தப் பதிவுக்குள் போகலாமா என்ற எண்ணம் பாவம் அவர் தூக்கத்தை நாம் ஏன் கலைக்க வேண்டும் என விட்டு விட்டேன். எப்போதும் எனது அழைப்புக்கு அது எந்த நேரமானாலும் பொறுப்பாக பதில் அளிப்பவர் அது செல்பேசியானாலும் நேரிடையானாலும்.

  எனது 5 ஆம் வகுப்பு ஆசிரியர் ஒருவர் பாஷா என்றிருந்தார், அவருக்கும் எனக்கும் எந்தவித பிடிப்பும் இல்லை ஏன் எனில் அவர் அப்படித்தான் எதிலும் பட்டுக் கொள்ள மாட்டார். அவரது மகன் கூட ஏதோ காதல் தோல்வியில் பல்லாண்டுகளுக்கு முன்பு காலமாகி இருந்ததை கேள்விப்பட்டேன். ஆனால் இந்த பாஷா அப்படி இல்லை எல்லா கோணங்களிலும் பயணிப்பவர்.எல்லோருடனும் கலந்து பழகுபவர் தம்மால் ஆன நன்மையை செய்ய நினைப்பவர்,மேலும் எல்லோருடனும் ஒரு உரிமையும் எடுத்துக் கொள்பவர் அவர்களுக்கு தம்மால் ஆன உதவியும் செய்ய நினைப்பவர் அதற்காக சிந்திப்பவர்.அவருடைய மனத்தாங்கலை குறை நிறைகளை என்னுடன் எப்போதும் மனந்திறந்து வெளிப்படையாக பகிர்ந்து கொள்வார்.

இவரை அவன் இவன் என்று நான் அழைக்குமளவு எனக்கு நெருக்கம். எனது தம்பி (போன்றவர்)

இவருக்கு மதப் பிடிப்பு எல்லாம் அறவே இல்லை என்பதை எங்கள் அறிமுக சந்திப்பிலேயே சொல்லி விட்டார். அல்லாஹு அக்பர், மாஷா அல்லா, இன்ஸா அல்லா என்றால் என்ன பாஷா என்ற விளையாட்டாக கேட்ட‌போதும் (ஏன் எனில் என்னிடமே குரான் தர்ஜமா உள்ளது ஒரு புறம் அரபி, மறு புறம் தமிழ் மொழிபெயர்ப்புடன், அதை நான் வாங்க நிறைய பட்டிருக்கிறேன் அதெல்லாம் வேறு) இவரது வாழ்க்கைத் துணைவியாரைக் கேட்டுச் சொல்லுமளவுதான் இவருக்கு கடவுள் பிடிப்பு. ஆனால் இயற்கைக்கு மாறு செய்யாத உள்ளம். மேலும் இவரைப் பற்றி நான் ஏன் பதிவு செய்ய அவசியம் என்றால் ஏறத்தாழ 80 சதவீதம் இறப்பின் விளிம்பு வரை கோவிட் 19ன் போது பயணம் சென்று வந்தவர். அப்போதும் அங்கிருந்தோரை உற்சாகமாகத் தேற்றி தானும் தேறி வந்து விட்டவர். இப்போதும் கழுத்தில் பெல்ட் போட வேண்டிய இன்னும் என்னன்னவோ உடல் சார்ந்த பிரச்சனை எல்லாம் நிறைய‌ உண்டு இருந்த போதும் மிகவும் துணிச்சலாக வாழ்க்கையை எதிர் கொண்டு வாழ்ந்து வருபவர். 

இரண்டு பெண்குழந்தைகள் இவருக்கு. 

இவரும் நானும் கிறித்தவ, முகமதிய, இந்து மத நண்பர்கள் 5 பேருக்கு மிகாமல் ஒரு இந்திய மத ஒருமைப்பாடு மற்றும் நல்லிணக்கப் பயணம் செய்ய வேண்டும் எனத் திட்டமிட்டோம். ஆனால் திட்டமிட்டதோடு சரி....பைக் பிரியர். இவரது இரு சக்கர வாகன பயணத்தை பெரும்பாலும் குறைத்துக் கொள்ள வேண்டும் என்று அன்போடு நான் கடிந்து கொண்டதுண்டு.

பாகிஸ்தான் ஏன் இன்னும் கிரே பட்டியலில் பிரான்ஸின் எப்.ஏ.டி.எப் வைத்துள்ளது?

இந்தியா அமைதியாக வாழும் சூழலில் உள்ள நாடுகளின் பட்டியலில் ஏன் இன்னும் 135 ஆம் இடத்தில் இருகிறது?

 எலன் மாஸ்க், பில்கேட்ஸ் ISRO, NASA, ASTRONOMY,SKY LAB இப்படி எந்தக் கருப்பொருளில் வேண்டுமானால் இவருடன் உரையாடலாம். அவ்வளவு சமூக அக்கறை. தெரிந்தவரை பகிர்ந்து கொள்வார். மொத்தத்தில் பாஷா நல்லவர்.

மனிதர்கள் தாம் முக்கியம் உயிர்கள் தாம் முக்கியம்

மதங்கள் அல்ல, சாதிப் பிரிவினைகள் அல்ல நிறவேற்றுமை அல்ல வறுமை ஒழிப்பு மனித மேம்பாடு அவசியம் அவற்றுக்கு மதங்கள் உதவட்டும்...எனக்கும் கூட  மாற்று மதக்காரர்களுடன் பழக பேச மிகவும் ஆசை உண்டு சிறு வயது முதலே நினைவு தெரிந்தது முதலே ஏன் இரண்டாம் வகுப்பு படிக்கும் போதிருந்தே  குழந்தை திரேசா என்ற பள்ளி ஆசிரியையுடன் நட்பு கொண்டதில் இருந்தே சொல்லலாம்...

 அவர்கள் வாழ்வின் முறை பற்றி தெரிந்து கொள்ள எப்போதும் ஆர்வம் உண்டு. எனவேதான் மதங்களைக் கடந்தவன் என்ற முறையில் பைபிள், குரான், கீதை எல்லாம் நூலாக வைத்துக் கொண்டு அதை துய்த்து வாழ்ந்து கொண்டிருக்கிறேன்.

நன்றி பாஷா!

நீ சொன்ன ஆப்பென் APPEN செயலி சென்று என்னால் பணி புரியவே முடியவே இல்லை...உள்ளே நுழைந்ததோடு சரி.ஒன்று அதற்கான ஓய்வு அல்லது மனநிலை இல்லை,இரண்டு அது அவ்வளவு எளிதாகவும் இல்லை.

மறுபடியும் பூக்கும் வரை

கவிஞர் தணிகை.