குற்றம் 23: கவிஞர் தணிகை

குற்றம் 23: கவிஞர் தணிகை




23 குரோம்சோம்களின் எண்ணிக்கையைக் குறிக்கும். செயற்கை முறை கருத்தரித்தல், கருவூட்டல் என்பார் கால்நடைகளுக்கு, அது விந்து தானத்தில் வந்து இந்த உலகில் அந்த விந்து விற்பனை நல்ல மதிப்பு மிக்க சந்தையை உலகில் கொண்டு வந்திருக்கிறது என்பதை நல்ல திரைக்கதையுடன் சொல்லும் படம்.

அருண் விஜய்க்கு இது ஒரு சொல்லிக் கொள்ளும் படம்.மஹிமா நம்பியார் சரியாக செய்திருக்கிறார் நடிப்பதாகத் தெரியாமல் இயல்பாக செய்திருக்கிறார்.தம்பி இராமய்யாவுக்கு வெற்றி மாறன் ஐ.பி.எஸ் என்கிற அருண் விஜய்க்கு துணை செய்யும் காவல் துறைப் பாத்திரம் சோபித்திருக்கிறார்.


நல்ல கதை தேர்வு இராஜேஸ்குமாரின் கதை. படத்தின் முக்கால் பாகம் நன்றாகவே பார்க்கும்படி செய்யப்பட்டிருக்கிறது. அறிவியல் தொழில் நுட்பம் விளக்கும் கடைசிக் கட்டத்தில் கொஞ்சம் அதிகம் காட்சிகளும், இன்னும் எளிமைப் படுத்தி தெளிவாக விளங்கும்படி செய்திருக்கலாமோ என்று தோன்றுகிறது.

அதாவது புருஷனின் விந்தணுவை வாங்கிக் கொண்டு வயிற்றில் வளர்க்க முடியாமல் வேறு அந்நிய நபர்களின் விந்தணுவை வாங்கி வயிற்றில் வளர்ப்பது பற்றிய சர்ச்சை. அதைப்பற்றி பிளாக் மெயில் செய்வது அதை உலகுக்கும், ஊருக்கும், உறவுக்கும், உற்றாருக்கும் வெளிப்படுத்துவோம் என்று சொல்லி பெரும்பணத்தை மிரட்டி வாங்குவதாக 4 பேர் அடங்கிய நபர்கள் அதில் ஒருவர் மருத்துவம் தெரிந்த நபர்.

இதனிடையே மற்ற 3 பேருக்கும் காசு பணம் பேராசை என்றால் ஒருவருக்கு அவரின் விந்தணுவை வாங்கிக் கொண்ட பெண் அதை வளர்த்து பிள்ளையாகப் பெற்று வாழ வளர்க்க வேண்டும் இல்லையேல் கொலை என்ற நிலை.

இந்தப் படம் எல்லா தரப்பு சினிமா இரசிகர்களையும் எட்டி வெற்றி ஈட்டுமா என்பது சற்று சந்தேகமே. ஏன் எனில் அருண் விஜய் கதாநாயக வேடத்தில் அதுவும் ஐ.பி.எஸ் வேடத்தில் நல்ல படியாக செய்திருந்த போதிலும்,கதை நல்லபடியாக நகர்ந்த போதிலும், இறுதியில் சற்று காட்சிகளும் சொல்லிய கதையும் சற்று அழுத்தம் அதிகத்தை கொடுத்து விடுகிறது.

நன்றாக கற்று இந்த விஷயத்தில் தெளிந்து தேர்ந்தவர்களுக்கு ஏற்றுக் கொள்ளும் புரியும் படம். வெற்றி மாறனின் அண்ணி குழந்தை இல்லாதிருந்து நல்லபடியாக கருத்தரித்து விட்டாள் என்னும்போதே கதையை நாம் ஊகித்தறிய முடிகிறது. அதன் பின் கொலையின் பின்னணிகளும் எல்லா கொலை செய்யப்பட்ட பெண்களின் அறிக்கைகளும் 23 என்ற எண் நிழலாக பின் புலத்தில் இருப்பதும் கதைக்கு வலு சேர்க்கிறது
என்றே சொல்ல வேண்டும்.

துப்பறியும் கதை, சொந்த வாழ்வில் பின்னிப் பிணைந்து அறிவியல் கூறுகளை அள்ளித் தெளித்திருக்கும்படம்.மேலை நாடுகளில் விந்தணு வியாபாரம் நன்கு இருக்கிறதாம், விந்தணுவுக்கு நல்ல விலை கிடைக்கிறதாம்.

ஆனால் இப்படிப் பார்த்தால் எந்தப் பெண்ணுக்கு யாருடைய விந்தணு வேண்டுமோ அவர் விருப்பப் பட்டால் அதை வாங்கி பெற்றுக் கொள்ளலாம் என்றால் அறிவியல் விற்பன்னர்களும், சாதனையாளர்களும், தலைவர்களும் நல்ல விலைக்கு எதிர்பாராத விலைக்கு கனவிலும் நினைக்காத விலைக்கு தமது விந்தணுக்களை விற்க முடியுமே.

இந்த நாட்டில் இப்போதே 140 கோடி மக்கள் தொல்லை, எனவே இந்த ஒரு சிலரின் பிரச்சனையான குழந்தையில்லா நிலைக்கு தீர்வு சொல்வதாக விந்தணு தானம், வியாபரம் என்ற ஊக்குவிப்பு செய்வதை விட அனாதைகளை,  ஆதரவற்றாரை தத்துக்கு எடுப்பதும் கொடுப்பதும் தான் சமூக அளவில் சரியானத் தீர்வைத் தரமுடியும்.





சினிமா என்பதற்கு சரிதான்.

மற்றபடி பாடல் தயாரிப்பு பற்றி எல்லாம் பெரிதாக சொல்ல ஏதுமில்லை. நல்ல முறையில் முயற்சி செய்து தயாரிக்கப் பட்டிருக்கும்படம். எதற்காக கொலை செய்யப்படுகிறார்கள் இந்த விந்தணுவைத் தாங்கிய தாய்மார்கள் என்பதை இன்னும் தெளிவு படக் கூறியிருக்கலாம் எனத் தோன்றுகிறது.

கணவனது இல்லாமல் வேறொருவரின் விந்தை ஏற்கும் விஷயம் வெளியே தெரியாமல் இருக்க ப்ளாக் மெயில் செய்யப்பட்டு கொலை செய்யப்படுகிறார்கள் கட்டளைக்கு கீழ்ப்படியாமல் பிறரிடம் இந்த உண்மைகளை வெளிப்படுத்த முனைவரையும் அதைப்பற்றித் தெரியவருகிறவரையும் ....அந்த முதல் காட்சியில் சர்ச் பாதர்....கொலை செய்து விடுகிறார்கள் அதை  யார் செய்கிறார்கள் எதற்காக செய்கிறார்கள் என உண்மை கண்டறியும் காவல்துறை முயற்சி என சுருக்கமாக சொல்லி விடலாம்,

48 மார்க் கொடுக்கலாம்.

மறுபடியும் பூக்கும் வரை
கவிஞர் தணிகை.

முப்பரிமாணம்: கவிஞர் தணிகை

முப்பரிமாணம்: கவிஞர் தணிகை






சாந்தனு பாக்யராஜ் ஹீரோவாக நடிக்க, பழைய கதையில் ஒரு நல்ல கிளைமாக்ஸ் செய்து வழங்கி இருக்கிறார்கள். இடையில் தாயை இழக்கிறார் போதை மருந்துக்கு அடிமையான கதிர் என்ற இளைஞர். இவருக்கும் அனுஷா என்னும் பெண்ணுக்கும் சிறு வயது முதலே காதல். முதல் காதல் என்றும் சொல்லலாம். முதல் காதல் காலத்திலிருந்தே இவர்கள் ஒருவரை ஒருவர் விரும்புகிறார்கள் என்றும் சொல்லலாம்

அதிகம் மெனக்கெடாமல் அதிக பொருட் செலவு விரயமின்றி நிறைய நடிகர்களை பயன்படுத்தி எடுத்திருக்கிறார்கள். எல்லா காலத்திலும் சொல்லப்பட்டு எப்போதும் இளைய சமுதாயம் சந்தித்து வரும் கதை அதே போரடிக்காத போராடி வரும் காதல் தான் மையக் கரு.

எல்லார் வாழ்க்கையிலும் எல்லாரும் கேட்பதுதான், காதலிப்பது என்பது திருமணத்திற்காகத்தானே அதன் பின் ஏன் காதலிகள் ஏதோ ஒரு காரணம் சொல்லிக் கொண்டு விட்டுப் பிரிந்து வேறொருவரை மணமுடித்துச் சென்று விடுகின்றனர்? காதலிக்கும்போது இவர்களின் பெற்றோரின் நிலையை இவர்களால் உணரமுடிவதில்லையா? இல்லை இவர்களுக்கு எதிர்காலம் என்றால் என்ன என்றே தெரிவதில்லையா? பிறர் வாழ்க்கை தொலைந்து போனால் அது நாம் செய்யும் பாவம் என்பதெல்லாம் புரிவதில்லையா?



இது போன்ற கேள்விகளுடன் இந்தக் காதலி தனது முதல் காதலை, பால்ய காதலை விட்டு விட்டு ஒரு பிரபல நடிகரை மணம் செய்து கொண்டு செட்டில் ஆகிவிடலாம் என வாழ்க்கை கணக்கு போடுகிறார் கொடி த்ரிஷா போல.

அவற்றுக்கு எல்லாம் பதிலடியாக இந்தக் காதலன் என்ன செய்தான், என்ன செய்கிறான் என்பதே சினிமாவின் முடிச்சு. இதைப் பற்றி பாக்யராஜ் ரெயில்வே ஸ்டேசனில் தினமும் குரல் வழியே இந்தக் காதலர்களுக்கு நேர்ந்தது மிகக் கொடுமை எனச் சொல்லி விளம்பரம் செய்து கொண்டிருந்தது இந்தப் படத்தை என்னைப் பார்க்கத் தூண்டியது.

தம்பி இராமய்யாவுக்கு எல்லாம் வேலையே இல்லை. நாயகியாக நடிக்கும் இந்தப் பெண் ஸ்ருஷ்டி நன்றாக நடித்திருக்கிறார்.




நல்ல கேள்வியைத்தான் எழுப்பி இருக்கிறார் இயக்குனர் அதிரூபன். ஆனால் இது ஒன்றும் புதிய கேள்வி அல்ல. இருந்தாலும் நம் சமுதாயத்தில் இது பதியுமா மாறுமா? என்பதெல்லாம் நம்முள் எழும் வழக்கமான கேள்விகள்.

பார்க்கலாம். 40 மார்க்கும் கொடுக்கலாம்.

மறுபடியும் பூக்கும் வரை
கவிஞர் தணிகை.

இந்தியர்களில் 3க்கு 2 பேர் லஞ்சம் கொடுக்கிறார்கள் ஆய்வில் தகவல்

மார்ச் 07, 03:47 PM

புதுடெல்லி

ஆசிய பசிபிக் நாடுகளில் அதிக அளவு லஞ்சம் கொடுக்கும் நாடுகளில் முதலிடத்தை இந்தியா பெற்றுள்ளது. இந்தியாவில் 3க்கு 2 பேர் டீ சாப்பிட வைத்துக்கொள் அல்லது  பிறவடிவங்களில் பொது சேவைகளை பெற லஞ்சம் கொடுப்பதாக கணக்கெடுப்பில் தெரியவந்து உள்ளது.

இந்த் கணக்கெடுப்பை சர்வதேச வெளிப்படைத்தன்மை சர்வதேச  ஊழ எதிர்ப்பு குழுக்கள் நடத்தியது. இதில் 69 சதவீதம் பேர்  லஞ்சம் வழங்குவதாக தெரிவித்து உள்ளனர்.தொடர்ந்து வியட்னால் 65 சதவீதம் பேரும், பாகிஸ்தானில் 40 சதவீதம் பேரும், சீனாவில் குறைந்த அளவாக 26 சதவீதம் பேரும் லஞ்சம் வழங்குவதாக தெரிவித்து உள்ளனர்.ஜப்பானில்  மிக குறைந்த அளவாக 0.2 சதவீதத்தினர் மட்டுமே லஞ்சம்  வழங்குவதாக தெரிவித்து உள்ளனர்.  தென் கொரியாவில்  3 சதவீதம் பேரும் தெரிவித்து உள்ளனர்.

கடந்த முறை 41 சதவீதம் பேர் லஞ்சம் கொடுப்பதாக தெரிவித்து 7 வது இடத்தில் இந்தியா இருந்தது. தற்போது பாகிஸ்தான்,ஆஸ்திரேலியா,ஜப்பான், மியான்மர், இலங்கை நாடுகளை விட அதிகரித்து விட்டது. 

ஆசிய பசிபிக் 16 நாடுகளில் 20 ஆயிரம் பேரிடம் இந்த கணக்கெடுப்பு நடத்தப்பட்டு உள்ளது.

பொது சேவைகளில் அதிக அளவு லஞ்சம் போலீஸ் துறையில் வாங்கபட்டதாக 36 சதவீதம் ஏழைகள் தெரிவித்து உள்ளனர்.அதிக அளவு பணம் லஞ்சம் வாங்குவது  வருவாய்துறையில் என தெரியவருகிறது.

போலீஸ் உள்பட பொது சேவை நிறுவனங்களுக்கு மக்கள் பணமாகவோ அல்லது பரிசு பொருளாகவோ அல்லது அவர்களுக்கு பிடித்த வகையிலோ கொடுத்து உள்ளனர்.

 நீதிபதிகள் அல்லது நீதிமன்ற அதிகாரிகள், ஆசிரியர்கள், மருத்துவமனை ஊழியர்கள், அரசு அதிகாரிகள், மற்றும் ஆவணங்கள் பெறும் அலுவலகங்களில் இந்த லஞ்சம் கொடுக்கபட்டு உள்ளது. என ஆய்வில் கூறபட்டு உள்ளது

மறுபடியும் பூக்கும் வரை

கவிஞர் தணிகை

நன்றி

தினத் தந்தி.

சிற்பி கொ.வேலாயுதம்: கவிஞர் தணிகை

சிற்பி கொ.வேலாயுதம்: கவிஞர் தணிகை




ச.மே.சிற்பி என்று தமது பேரை வைத்துக் கொண்டார் அதாவது சமூக மேம்பாட்டு சிற்பி என்று தம்மை நிறுவிக் கொண்ட எனது அன்பு சகோதரர் கொ.வேலாயுதம் இளைஞர் இணைப்பாளர் பற்றிய பதிவு இது.

1981 _ 1982 வாக்கில் இந்த மனிதரை நான் சந்தித்தேன். அப்போது இவர் சேலம் மாவட்ட நேரு இளையோர் மைய இளைஞர் ஒருங்கிணைப்பாளர்.நல்ல மனிதர்,பண்பாளர்.இவரின் தொடர்பும் நட்பும் இன்று வரை மிகுந்த காலப் புரட்டுதல்களுக்கும் பின்னும் தொடர்கிறது. அப்போது வெறும் கொ.வேலாயுதம்தான் பேர். நான் இவரை எனது சகோதர நண்பர் என்றே எனது எழுத்துகளில் குறிப்பிட்டு வந்துள்ளேன். ஒரு வகையில் சகோதர பாசத்துடன் மேலும் அதை விட நட்பு பாராட்டுதலுடனும் இருப்பவர். இன்று வயது 70க்கும் மேல் ஆகி விட்டது .முதுமை ,நினைவு மறதி எல்லாம் வந்து விட்டாலும் என்னுடன் அவ்வப்போது பேசி வருகிறார். தொடர்பில் இருந்து வருகிறார்.

இவர் அப்போது பெரும்பாலான நல்ல இளைஞர்களின் வழிகாட்டி.இவர்தான் நவ இந்திய நிர்மாணிகள் இயக்கம், காந்திய வழியில் ஊருக்குப் பத்துப் பேர் இயக்கம், தமிழக இலட்சியக் குடும்பங்கள் என்றெல்லாம் பேர் மாற்றி மாற்றி தமது சேவையை இந்த நாட்டுக்கு வழங்கி வந்தார்.அதற்கெல்லாம் இவர்தான் நிறுவனத் தலைவர். இடையில் பிராங்க்ளின் ஆசாத் காந்தி போன்ற எத்தனயோ பேர் வந்து போனார்கள்.



இவரது தலைமையில் ஒரு இளைஞர் பட்டாளம் இயங்கியது உண்மைதான். ஆனால் அது படையாக உருவெடுக்கவில்லை என்பதுதான் எப்போதுமே எமது தீராத குறையாக இருந்தது. இவரின் குரல் பாடல் வளம் மிக்க குரல். ஆனால் சற்று மங்கிய குரல். எனவே இயக்கத்தில் எனது குரல் வளம் உரை வீச்சுக்கு பெரும் பங்கு பெற்றது.

இந்த இயக்கத்தில் இராமலிங்கம், செம்முனி,இஞ்சினியர் மணி, சின்ன பையன் இவர் மது விலக்கு வேட்பாளராக சேலம் வடக்குத் தொகுதியில் நின்று எண்ணூற்று சில்லறை வாக்குகள் பெற்ற வேட்பாளர்,சசிபெருமாள் , தமிழரசு (ஓமலூரி முன்னால் எம்.எல்.ஏ) செங்கிஸ்கான், காசாம்பு, ஜமுனா, பீபி ஜான் , புகழேந்தி வழக்கறிஞர் தங்கவேல் இப்படி பல இளையோர் உருவாக அடித்தளமாக இருந்தது.



சிந்தனையாளர் அர்த்தனாரி என்ற ஒரு பெரியவர் வருவார். இவர் தொழில் அதிபர், அதே நேரம் கம்யூனிஸ்ட்,என்பார் இவருக்கும் எனக்கும் எப்போதுமே லடாய் உண்டு. இவருக்கு காந்திய மாமனிதர் என்ற பட்டம் தருவதை திருச்சி மாநாட்டில் நான் ஆய்வு செய்த பிறகே தரவேண்டும் எனத் தடுத்து விட்டேன். அப்போது என்னை எட்டிக்காயாக பார்த்த இயக்கத்தினர் மறுபடியும் சற்று காலம் சென்றபின்னே நான் செய்தது மிகச் சரியானது என உணர்ந்து கொண்டனர். நான் தொடர்ந்தேன் .அவரால் முதுமை காரணமாக தொடரமுடியவில்லை, மல்லி ராஜா என்னும் பேராசிரியர் , சோலை அய்யர் இப்போது ஓய்வு பெற்ற ஐ.ஏ.எஸ் , வின்சென்ட் இப்படி ஏராளமானவர்கள் வருவதும் போவதுமாக இருப்பார்கள். இயக்கம் ஒரு அறிவார்ந்த சபையாக அதிகமாக நானொரு சண்டைக்காரன் என்ற பேருடன் இயங்கியபடியே இருந்தது.


நான் அப்போதே ஒரு தேசிய சேவைத் தொண்டராக இவரால் மத்திய கல்வி கலாச்சாரத் துறையில் பணியமர்த்தப் பட்டேன். அந்தப் பணியில் சுமார் ஒன்னேமுக்கால் ஆண்டு பணி புரிந்தேன். அதன் பின் கிராமிய விழிப்புணர்வு மற்றும் மேம்பாட்டு இயக்கம் என்ற ஒரு இயக்கத்தின் திட்ட அலுவலராக சேலத்தில் உள்ள மலை வாழ் மக்களுக்கு பணிச் சேவை புரிய ஆரம்பித்தேன் அவரும் நானும் இயக்க ரீதியாக அலுவலக ரீதியாக ஒருவருக்கொருவர் பிணைந்து உதவி புரிந்து கொண்டோம். நல்ல வளமான நாட்கள்.ஆனால் எப்போதும் போல அப்போதும் பொருளாதார பற்றாக்குறை என்னுடன் இருந்தபோதும் அனைத்துக் கூட்டங்களிலும் ஒரு முக்கியமான நிறுவனருக்கு அடுத்த நிலையில் இருந்து பணிச் சேவை புரிந்தேன். கூட்டங்கள் அத்தனையும் எனது பேர் சொல்லியது. அப்போதுதான் நதி நீர் இணைப்பு கட்டுரை வெளியிடப்பட்டது. ஜனநாயக மறு சீரமைப்பு கட்டுரையும் வெளியிடப்பட்டது. ஆனால் மாநிலம் முழுதும் எனது பணி எதிர்ப்பார்க்கப்பட்டது .எனது உடல் நலம் ஒத்துழைக்காததால் ஒரளவுடன் எனது இயக்கப் பணிகளை மட்டுப் படுத்திக் கொண்டேன்.

அச்சமில்லை, பத்திரிகை நடத்தப்பட்டது, மாதம் ஒரு முறை மக்கள் கலைப் பண்பாட்டுக் கழகத்தின் மூலம் கவிதைப் பட்டறை, பட்டி மண்டபங்கள், உரை வீச்சுகள், தர்க்க விவாதங்கள் யாவும் நடத்தப் பட்டன.

ஒரு பக்கம் அலுவலக முறைகளில் இளைஞர்களின் எழுச்சியாக இருந்த இவர் மற்றொரு பக்கம் நாட்டின் ஆட்சி மாற்றம், இளைஞர்களின் விழிப்புணர்வு, தலைமைப் பொறுப்பு பயிற்சிகள், பணி முகாம் ஆகியவற்றை நடத்தியே வந்தார் எமது அனைவரின் சார்பாகவும். நாட்டின் எல்லா முன்னணித் தலைவர்களுடனும் கூட தொடர்பிலிருந்தார்.

அப்போது நினைத்திருந்தால் நல்ல நிலையில் ஒரு பாராளுமன்ற உறுப்பினராகவும் அல்லது இராஜ்ய சபா உறுப்பினராகவும் வந்திருக்கலாம். ஆனால் அதை எல்லாம் மீறிய நோக்கமாக நாட்டை கைக்கொள்ள நமது இளைஞர் வீறு கொண்ட படை தயாரிக்க வேண்டும் என்ற முயற்சியே மேலோங்கி இருந்ததால் தம்மிடம் இருந்த ஒரு இளைஞர் சாதியக் கட்சியில் சேர்ந்து எம்.எல்.ஏ ஆன போதும் கூட இவரால் எந்த பதவிக்கும் செல்ல உந்துதல் இல்லை.

இவர் பாட ஆரம்பித்தால் பெண்கள் எல்லாம் கூட்டத்தில் அழுவார்கள். நல்ல பாடல் புத்தகங்களும், இசை ஒலி நாடாக்களும் சேக்ஸ்பியர் என்ற காந்திய மன்றம் இன்னும் நடத்திவரும் அமரகுந்தியை சார்ந்த வன இலாகவில் பணி புரிந்து வரும் நண்பருடன் சேர்ந்து வெளியிடப்பட்டன.

கண்ணன், அருணாச்சலம் போன்ற இளைஞர்கள் அமரக்குந்தியில் இவருக்கு கிடைத்தனர் கண்ணன் இப்போது உதகையில் ஒரு மின் பொறியாளர், அருணாச்சலம் மகள் தாம் படித்த பொறியாளர் பல்கலையில் தங்க மெடல் பெற்ற முதல் மாணவி.

கொ.வேலாயுதம் பற்றி சொல்ல வந்த நான் இவர்களைப் பற்றி எல்லாம் சொல்ல ஆரம்பித்து விட்டேன். வேறு வழியில்லை இவர்களைப் பற்றி சொன்னாலும் வேலாயுதம் பற்றி சொன்னது போல,வேலாயுதம் பற்றி சொன்னால் இவர்களைப் பற்றியும் சொல்வது போலவே. வேலாயுதம் அந்த நாட்களில் படித்த ஒரு முதுகலை கணிதப் பட்டதாரி. கல்லூரியில் விரிவுரையாளராக பணி புரிந்த பின் மத்திய அரசின் கல்வி கலாச்சாரத்துறையில் நேரு யுவக் கேந்திராவின் சேலம் மாவட்டத்தில் பல்லாண்டுகளாக இளைஞர் ஒருங்கிணைப்பாளராக பணி புரிந்தார். கிளஸ் ஒன் ஆபிசர்தான். ஆனால் நமது சகாயம் போல, இறையன்பு போல...நல்ல எளிமையான அனைவர்க்கும் பிடித்த நல் மக்கள் சேவையாளர்தான்.

பணிக்கும் அப்பால் இவர் நிறைய நாட்டுக்கு சேவை செய்ய வேண்டும் எனச் சொல்வதை விட நாட்டின் தலைவிதியை மாவோ போல, லெனின் போல, மாற்ற வேண்டும் என ஆசைப்பட்டார்.அனைவரையும் தம்பி என்றே அன்பொழுக அழைத்தார்.அழைப்பார். முழுக்கை மேல் சட்டை, சாதாரண கால்சட்டை அதை இன் சர்ட் கூட செய்யாமல் கைகளில் பொத்தானிடாமல் இருப்பார், இவர் குஜராத் வடோதரா பரோடாவுக்கு ரீஜினல் கோ ஆர்டினேட்டராக ஆனபோதுதான் இன்சர்ட் செய்ய ஆரம்பித்தார்.



அதன் பின் விருப்பப் பணி ஓய்வும் பெற்றார். ஆனல் சேவயை விடவில்லை.
சின்ன பையன் அதன் பின் தான் தேர்தலில் நிறுத்தப்பட்டது, சசிபெருமாள் அதன் பின் தான் செல்பேசி கோபுரத்தின் மேல் சென்று மடிந்து போனது எல்லாம் நடந்து முடிந்தது. சின்ன பையன் மறைந்து சில ஆண்டுகள் ஆகிவிட்டன.

இதில் இடம் பெறும் கேரக்டர் ஒவ்வொன்றையும் தனியாக எழுதலாம் .அதை பின் வைப்போம். இன்குலாப், ஆடிட்டர் ரமேஷ், பீட்டர் அல்போன்ஸ், போன்ற பிரபலங்களை எல்லாம் எமது நிகழ்வுகளின் போது சந்தித்தேன். மேலும் மாவட்ட ஆட்சித் தலைவராக இருந்த எம்.எப். பாரூக்கி அப்போது எமது இருவருக்கும் நல்ல நட்பு பாராட்டி வந்தார்.அன்றைய காலக் கட்டத்தில் இப்போது திராவிடர் கழகத்தின் முன்னணித் தலைவரான அருள் மொழியுடன் கூட எமது நட்பு இருந்தது இன்றும் பசுமையாக இருக்கிறது. அவரும் நானும் அப்போது இளையவர்கள். அவர் பாரதி தாசனையும் நான் பாரதியையும் உயர்த்திப் பிடித்துப் பேசியபடியே அறிவார் விவாதம் செய்து கொள்வோம்.

இராசாராமின் சபாநாயகராகவும் தமிழக அமைச்சராகவும் இருந்த அதே இராசாராம், அவரது மூத்த சகோதரர் ஜெயசீலன் ஆகியவர்களையும் அந்தப் பருவத்தில் சந்தித்தேன்.

இவரின் துணைவியார் இந்த சேலம் மாவட்டத்தில் ஒரு கை தேர்ந்த மகப்பேறு மருத்துவர் டாக்டர் வள்ளி வேலாயுதம் , இவர் அன்பு மருத்துவமனை என்ற ஒன்றை நிறுவி தமது அரசுப்பணியை விருப்ப ஓய்வு கொடுத்து விட்டு வந்து முடிந்த வரை எளிய பொருட்செலவில் மக்களுக்கு மருத்துவம் செய்தார். மேலும் இவர்களது 2 மகன்கள் விமல்ராஜ், சார்த்தி ஆகிய இருவருமே முதுகலை மருத்துவம் பட்டம் பெற்று அவர்களது துணைவியார்களையும் மருத்துவர்களாகவே தேடிக் கொண்டனர். எனவே நான் இவர்கள் குடும்பத்தை சிசுருதர் குடும்பம் என்று செல்லமாக அழைப்பதுண்டு. 5 மருத்துவர்கள்  இவரது குடும்பத்தில். அனைவரும் இப்போது சென்னையில். நான் அளித்த அந்த ஒர்  திருமண வாழ்த்து இப்போதும் அவர்கள் வரவேற்பறையில் இடம் பெற்றிருப்பதாக அவர் சொல்வார்.

சசிபெருமாள் தமது சத்தியாக்கிரக உண்ணா நோன்பு மதுவிலக்குப் போராட்டம் ஆரம்பிக்கும் முன்பே சென்னையில் கலைஞர் கருணாநிதி முதல்வராக இருந்தபோதே இந்த அணியினர் உண்ணாநோன்பை 30 பேர் அடங்கிய குழுவாக இருந்து சாதிக்க துணை புரிந்தனர். மேலும் ஒகேனக்கல் கூட்டு குடி நீர்த்திட்டத்திற்கு இந்த இயக்கப் பெண்டிர் தான் முதலில் போராடி சிறை சென்றனர்.

இந்த மனிதரை நான் சந்தித்தது ஒரு நல்ல சம்பவம் மூலம் என்றாலும் கூட மற்றொரு போட்டியில் இடது சாரி கருத்தை சிந்தனையை விதைத்த காரணத்தால் ஒன்னும் சரியாக செய்யாத பெண்களுக்கு போட்டியில் பரிசளித்த மாவட்ட குடும்ப நல அலுவலருடன் சண்டை . அப்போது போட்டியில் நான் தோற்றபோதிலும் இந்த அரிய மனிதர் கிடைத்தார்.அதில் இராஜா போன்ற இளைனர்கள் எனது பக்கம், எனது பேச்சை பார்த்து அசந்து போன இளையோர் பட்டாளம் எப்போதும் எல்லா கூட்டத்திலும் எனது பேச்சை கேட்க பேராவல் கொன்டிருந்தது. ஒரு உயர்ந்த நிலையில் உள்ள அரசு அலுவலர் மத்திய அரசுப் பணியில் இவ்வளவு எளிமையுடன் இருக்கிறாரே என அவரை எனக்கு மிகவும் பிடித்துப் போயிற்று. அவரும் என்னுள் இருந்த என்னைக் கண்டு முதல் அங்கீகாரம் அளித்து என்னை எல்லா நிலையிலும் தக்க வைத்துக் கொண்டார். நாங்கள் ஒருவருக்கொருவர் சகோதர நண்பர்களானோம், குடும்ப நண்பர்களுமாக இருந்தோம்.இருக்கிறோம் .இன்று அடுத்த தலைமுறை அடுத்த தலைமுறை எனக் காலம் ஓடிச் சென்று எமை எல்லாம் வீழ்த்தியபோதும் வாழ்த்தியபோதும்...



இயக்கத்தை ஒரு கட்டுப் பாட்டில் வைக்க எண்ணி எவரையும் அநாவசியமாக சிறைக்கனுப்பாமல் இவர் தலைமையில் இயக்கம் சென்றது ஒரு வகையில் பார்த்தால் சரியானது என்றபோதிலும் அதனால் தான் வளரவில்லையோ என்று இப்போது நினைக்கவும் தோன்றுகிறது. சசி பெருமாள் போன்றோர் இயக்க கட்டுப்பாட்டை மீறி பிச்சை எடுத்ததும், குடிகாரர் காலில் விழுந்து குடிக்காதே எனக் கெஞ்சியதும் என்னால் கண்டிக்கப்பட்டது. இவரே ஒரு காலக்கட்டத்தில் ஒரு அரசு மருத்துவரை பணி நேரத்தில் செருப்பால் அடித்து விட்டு சிறை சென்றவராக இருந்தார் என்பது எம் போன்றோருக்கு மட்டுமே தெரியும் காலம் சசியை எப்படி மாற்றி விட்டது...ஊடக விளம்பரங்களும்தான்.

நமது சுதந்தரப் போராட்டத் தியாகிகளில் எத்தனையோ பேர் பேர் தெரியாமலே மறைந்து போயினர். அப்படி இந்த வேலாயுதம் என்ற ஒரு நல்ல மனிதரின் சேவையும் மறைந்து போய் விடக் கூடாதே என்ற கோணத்திலேயே இந்த பதிவு அவருக்குரிய வணக்கத்தை தெரிவிக்கிறது.



மேலும் இதில் சொல்லாமல் விட்டது நிறைய. சொல்லியது கை அளவு இப்போது நினைவுடன் இருந்தது மட்டுமே... எனக்கு குடி நீர் பிடிக்கும் வேலை...வீட்டில் எவரும் இல்லை ...எனவே அது போன்ற அன்றாட வாழ்வின் தேவைகள் நமது சாதனை சரித்திரத்தை எல்லாம் ஒரு சிறு பதிவாக்கி விட்டு காலத்துள் கரைந்து போக வைத்து விடுகிறது. லெனின் சரித்திரத்தை யெல்ட்சின் என்ற ஒரு புண்ணாக்கு சின்னா பின்னப் படுத்தியதே ரஷியாவில் நமக்கு அது நினைவிலிருக்கிறது.



மறுபடியும் பூக்கும் வரை
கவிஞர் தணிகை.

செல்லாத நாணயங்கள்: கவிஞர் தணிகை

செல்லாத நாணயங்கள்: கவிஞர் தணிகை

நிறைய எழுத வேண்டும். நிறைய நிறைய சம்பவங்கள் நடைபெறுவது பற்றி.ஆனால் நேரம் காலம் தேடல் ஒத்து வரவில்லை.ஒரு புறம் நெடுவாசல் ஹைட்ரோ கார்பன், திருப்பதி ஏழுமலையானிடம் செல்லாத நோட்டுகள் 5 கோடி,சுசித்ராவின் உண்மைகள்,சமையல் எரிவாயு விலை ஏற்றம் அது இன்று:டெலிவரி பாய்க்கு நீங்கலாக ரூ.771. வீட்டு உபயோகத்திற்கானது, எல்லா வங்கிகளிலுமே இனி சேவைக்கு கட்டணம் இருக்கும் , முக்கியமாக பாரதிய ஸ்டேட் வங்கி தனி மனித சேமிப்பு இருப்பை உயர்த்தியும், 3 முறைக்கு மேல் பணம் எடுத்தால் கட்டணமும்...மல்லையாக்களிடம் விட்டதை எடுக்க வேண்டுமல்லவா? இப்படி மோடி ஆட்சி தலை விரித்து ஆடிக் கொண்டு மக்களுக்கு ரேஷன் கூட கிடைக்க விடாமல் செய்து வருகையில் மோடி ஜக்கியின் கட்டணக் கூட்டத்தில் குஜராத், ஒரிஸா ஆங்கிலத்தில் பேசியபடி போட்ட நீலக் கலர் சால்வையை ட்விட்டரில் கேட்ட பெண்ணுக்கு அனுப்பி வைக்கிறார்.



மாநில மசாலாக்களோ, நிரந்தர முதல்வர் மக்களுக்காகவே வாழ்ந்த முதல்வர் அம்மா ஜெயலலிதாவை புனிதராக்க, தெய்வமாக்க, அந்த தெய்வம் எப்படி மறைந்தது என ஆய்வு நடத்திக் கொண்டு குடிக்கவும் நீர் கொடுக்க நாதி இன்றி ஒரு கொடுங் கோடையை சந்திக்க வைக்க இருக்கிறது.

பள்ளி மாணவர்கள் இறுதித் தேர்வை எட்டி வருகையில் மின் வெட்டு பயம் வேறு அச்சுறுத்தி வருகிறது.ஓ.பி.எஸ்கள்  பி.எச் பாண்டியன்கள் அம்மாவை தள்ளி கீழே வைத்து கொன்றிருக்கிறார்கள் என்ற உண்மைக்கு அருகே வந்து விட்டதாக பேராண்மை பேசுகிறார்கள் அந்த 75 நாட்களை மறந்துவிட்டு, ஆட்சியும் பதவியும் கிடைக்க வில்லை என....

ஆங்காங்கே உள்ளூரில் ஜெ கட்சி அதாவது உச்ச நீதி மன்றத்தால் குற்றவாளி என அறிவிக்கப் பட்ட குற்றவாளியின் கட்சி , அதற்காக கலைஞரையும்,ஸ்டாலினையும், வைகோவையும், நாம் மிகத் தூய்மையானவர்கள் எனக் கருதவில்லை...உள்ளூர்களில் ஜெ தீபா பேரவை என்றும் எடப்பாடி சசி பார் அவை (டாஸ்மாக் பார்தான்) என்றும் பிரிந்து முகங்களுடன் சாலைகளில் பொது சந்திப்புகளில் மக்களை பயமுறுத்தி வருகிறது

இதனிடையே செல்லாத நோட்டு வைத்திருந்தால் அபராதம் ஜெயில் என்றெல்லாம் பேசும் மத்திய மாய்மால மோடி அரசு ஒரு நோட்டு வைத்திருந்தாலும் 3 ஆண்டு சிறை என்று பேசும் மத்திய அரசு திருப்பதி வெங்கடாஜலபதியிடம் உள்ள 5 கோடி ரூபாய் செல்லாத நோட்டுகளை வைத்திருக்கும் அந்த உலக நாயகன் வசூல் மன்னனுக்கு எப்படி தண்டனை தரவிருக்கிறது? எவ்வளவு அபராதம் இடப் போகிறது?

நாம் ஒன்றை கவனிக்க வேண்டும்: கடவுளுக்கும் காசுக்கும் துளியும் தொடர்பில்லை .பணக்காரர் இறையருள் பெறுவதென்பது ஊசியின் காதில் ஒட்டகத்தை நுழைப்பது என்கிறது விவிலிய மறை.

ஆக நான் சொல்ல வேண்டியது இப்போது இனி சொல்லப் போவதுதான்: நான் இப்போது 55 வயதை நிறைவு செய்யும் நிலையில் உள்ள மனிதன். எனது இளைமையில், சிறுவனாக இருந்த போது ஒரு பைசாவுக்கும் மதிப்பு உண்டு ஒரு மிட்டாய் கண்டிப்பாக கிடைக்கும், இரண்டு பைசாவுக்கு ஒரு பட்டாசு ரோல் கிடைக்கும், 3 பைசாவுக்கு ஒரு முறுக்கு கிடைக்கும், 5 பைசாவுக்கு வேண்டியது பொட்டுக் கடலை, பட்டாணி கூட கிடைக்கும், நிலக்கடலை பர்பிகள், தின்பண்டங்கள், போண்டா, பஜ்ஜி, வடை எல்லாமே கிடக்கும், அது அணாக்கள் காலம் மறைந்து ரூபாய்க்கு 100 பைசா வந்து விட்ட காலம்தான்.

என்றாலும், 25 பைசாவை நாலணா, அதாவது 4 பெருக்கல் 6 பைசா  அதாவது 24 பைசாவுடன் ஒரு பைசா சேர்த்து  இருந்தாலும் அதை நாலணா என்றுதான் சொல்வார்கள். ஐம்பது பைசாவை எட்டணா என்றுதான் சொல்வார்கள் எட்டு பெருக்கல் ஆறு 48 பைசா என்பது 50 ஆகா இருந்தாலும்

25 பைசா, 30 பைசா, 50 பைசாவுக்கு எல்லாம் சாதரணமாக ஒரு சினிமா பார்க்க முடியும், பத்து பைசாவுக்கே ஏகப்பட்ட திட்டங்கள் தீட்டுவோம், அதை வைத்து சில நாட்கள் இன்பமாக போகும், மேலும் அந்த வெள்ளி நிறக் காசை.அதன் பிறகு தங்க நிறத்துக்கும் அந்த பத்து பைசாவும், 20 பைசாவும் மாறியது வேறு...

கையில் அதை எல்லாம் வைத்திருப்போம் தூங்கும்போதும் பாக்கெட்டில் இருக்கும் அதை யாராவது ஒரு விருந்தாளி வந்தபோது பெற்றோர் வேண்டாம் எனச் சொன்னாலும் இருக்கட்டும் என அவர்கள் ஆசையாய் தந்து சென்றதாய் இருக்கும் அது...



எனது சகோதரி ஒருவர் அடிக்கடி நாங்கள் பள்ளி செல்கையில் ரயில் ரோட்டில் தான் செல்வோம் அப்போதும் காசுகளை கண்டு எடுப்பார், ஏதாவது தின்பண்டங்கள் வாங்கி வீட்டுக்குத் தெரியாமல் தந்து விடுவார், அதில் தான் எமது பற்கள் முதலில் சொத்தை விழ ஆரம்பித்து இருக்கும் என நம்பி குற்றச் சாட்டை சொல்வதுண்டு, ஏன் எனில் அந்த இனிப்பு மிட்டாய்கள் அல்லது தீனிகள் சாப்பிட்டு விட்டு வாயை சுத்தம் செய்யாமல் இருந்திருக்கிறோம்.

வீட்டிலேயே கொழுஞ்சிப் பழங்கள், கொய்யாப் பழங்கள், கொடுக்காப் புளி(நாங்கள் அதை கோண புளியாங்காய் என்போம்) இப்படி நிறைய சத்துப் பண்டங்கள் காய்களாக கனிகளாக கிடைத்த போதும் கடையில் வாங்கித் தின்பது ஒரு இனிப்பான விஷயமாகவே இருக்கும். மாங்காய் உப்பு, காரம் போட்டது, சௌ மிட்டாய்கள், வாட்ச்கள், கையில் ஒட்டி வைக்கும் பொம்மைகள், மணியுடன் அடித்து மிட்டாய் விற்கும் வயதான நபர்கள் அந்த ரோஸ் வண்ண மிட்டாய்கள். இப்போது அந்த மரங்கள் இல்லை கெம்ப்ளாஸ்ட் கழிவு நீருக்கு அந்த இரசாயன மாற்றத்தில் காலாவதி ஆகிவிட்டன.

அப்படிப்பட்ட 20 பைசா தங்க நிறத்தில் இருப்பதைப் பார்த்து காசை உருக்கி எனது தந்தை ஒரு முறை மோதிரமாக செய்து போட்டுக் கொண்டதாகவும் நினைவு. அந்த காந்தி தலைக் காசுகள், மொட்டைத் தலைக்காசுகள் அவ்வளவு பிரபலம்.



நாலணா  இருந்தால் போதும் எந்தக் காய் கறியும் கிடைக்கும் ஒரு பெரிய குடும்பத்துக்கே காய் கறி சமைக்க, குழம்பு வைக்க...பெரிய குடும்பம் என்றால் எங்களுடையது போல 10 பேர் அடங்கியது அல்லது 5 அல்லது 6 பேருக்கும் மேல் உள்ளது... இப்போது ஐந்து அல்லது ஆறு பேர் இருந்தால் வீடே வாடகைக்கு கிடைப்பதில்லை என்பது வேறு விஷயம்.பொறி கடலை வாங்கி குடும்பமே அதை வறுத்து உண்டு மாலை நேர டிபனாக மாற்றிக் கொள்ளும் வருவாருக்கும் கொடுக்கும்.

ஒரு எட்டணா அதான் 50 காசு கொடுத்து விட்டால் அதை மறக்கும் வரை எனது அம்மாவிடமிருந்து மறுபடியும் காசு வாங்க முடியாது, அன்னைக்குத்தானே கொடுத்தேன் , அன்னைக்குத் தானே கொடுத்தேன் என 6 மாதமானாலும் ஒரு வருடமானாலும் சொல்லிக் கொண்டே மறுத்தார்கள் சில வருடங்கள் கூட அப்படி சென்றிருக்கலாம்...குடும்பம் பெரிது பிரச்சனைகள் அதிகம், அதில் நாங்கள் சிறுவர்கள் எங்களுக்கு அந்த கஷ்ட நஷ்டங்களை உணரும் அளவில் நாங்கள் பக்குவம் பெறாத வயது...

அரிசி இல்லாமல் உணவில்லாமல் கஞ்சி வைத்துக் காய்ச்சி பசி ஆறிய அனுபவங்கள் எல்லாம் எங்களிடம் உண்டு.. எனவே காசு என்பது எப்போதும் எமக்கு பெரிய விஷயம்தான்.

எமது சகோதரிகள் கோலப்பொடியை கெமிகல் லைனில் இருந்து எடுத்து வருவார்கள், வீட்டில் வளர்த்த‌ கனகாம்பரம், மல்லிகை பூக்களை கட்டி விற்று விட்டு வரும்போது...அதையும் விற்று பைசாவாக்கியதாக குடும்பத்திற்கு உதவியதாக நினைவு...ஏன் காடுகளிடம் சென்று அரப்பு மரங்கள் செடிகளிடம் அரப்பு இலை பறித்து வந்து, காய வைத்து இடித்து பொடியாக்கி நைசாக இருக்க அதை அனைவரும் தலைக்கு குளிக்க பயன்படுத்தியதுண்டு வீட்டில் உள்ள 5 பெண்களுக்கும் நல்ல அடர்த்தியான தலைமுடி காசுக்கு வாங்கி தலைக்கு குளிக்க வேண்டுமெனில் அதுவும், கடினமானது எனவே இந்த முயற்சி இதில் மீதமாகும் அரப்பை அக்கம் பக்கம் ஒரு கால் படி உழக்கு, அரைப்படி, ஒரு படி இவ்வளவு விலைக்கு என விற்று காசு சேர்த்து குடும்பத்துக்கு உதவியதும் உண்டு...

செல்லாத காசு எங்கே எங்கெங்கே போகிறது பாருங்கள்... எமது பள்ளியை அடுத்துள்ள காவிரிக்கு துணி துவைக்க சென்று துணி துவைத்து அவர்கள் நீச்சல் அடித்து குளித்தும் விட்டும் வருவார்கள் எனச் சொன்னதுண்டு...நாங்கள் சிறுவர்கள் எங்களுக்கு இன்னும் நீச்சல் தெரியவில்லை....அவர்கள் அனைத்தும் கற்றிருந்தார்கள் ஆனால் அதிகம் படிக்கவேயில்லை...

நேற்று ஒரு அரசுப் பேருந்தில் சேலத்தில் இருந்து எமது பகுதிக்கு 19 ரூபாய் கட்டணத்துக்கு 20 ரூபாய் கொடுத்தேன். டிக்கட் கொடுத்த அவர் நேர்மையாக வாய் விட்டு ஒரு ரூபாய் அப்புறம் கொடுக்கிறேன் என்றார். நல்ல மனிதர் வாய் விட்டே சொல்லி விட்டார் அவர் கொடுத்து விடுவார் என ஏதேதோ நினைவில் மூழ்கியபடி ஊர் வந்து சேர்ந்தேன், அவரும் கொடுக்கவில்லை, நானும் கேட்க வில்லை. அப்போது கேட்க எனக்கும் நினைவில்லை...

ஆக இப்போது பிச்சைக்காரர் கூட 50 பைசா நாணயத்தை அங்கீகரிக்க மறுத்து விடுகிறார்கள்...எனக்கு இன்னும் ஒரு ரூபாய் பெரியதுதான்...இந்த காசுக்கு எல்லாம் மதிப்பு போயிற்றா? மனித மதிப்பும் அரசியல், ஆட்சி, பதவி இதன் மதிப்பு எல்லாம் போய் செல்லாக் காசாக போயிற்றா?



எம்.ஜி.ஆர் சொல்வார் தமது முதல் கூட்டங்களில் எல்லாம், அது ரெக்கார்டாகவே எல்லா ஊர்களிலும் முழங்கியது ,நாட்டை ஆள வருவாரிடம் நா நயம் இருந்தால் மட்டும் போதாது நாணயம் இருக்க வேண்டும் என...இப்போது நாணயம் எங்கும் இல்லை நான் சொல்வது காசு எனப்படும் நாணயத்தையும் சேர்த்துத்தான் சொல்கிறேன். ரிசர்வ் வங்கி 10 ரூபா  காசு நாணயம் செல்லும் செல்லும் என அறிக்கை விடுத்தாலும் மக்கள் நம்பி வாங்க மறுக்கிறார்கள்...ஆயிரம், ஐநூறு செல்லாது , வங்கிக் கணக்கில் இருக்க வேண்டும் அது தான் செல்லும் என்று மோடி சொன்னாலும் சொன்னார் அன்றிலிருந்து எல்லாம் மாறி விட்டது ஆமாம் உப்பு 200 முதல் 750 ரூபாய்க்கும் கூட விற்று விட்டார்கள்...ஆட்சியும் அதிகாரமும் கட்டளை விதித்து கட்டுப் படுத்த வேண்டியதாயிற்று...

எடப்பாடி தமது காசு பணம் செல்வாக்கை மட்டுமே நம்பி முதல்வரான வரலாறு நம் தமிழ் மண்ணுக்கு புதிது. அவரிடம் தங்கக் காசு வாக்குக்கு பெற்றுக் கொண்டு அவரை ஜெயிக்க வைத்த எடப்பாடி தொகுதி மக்கள் வாங்கிய காசுக்கு நாணயமாக அவருக்கு வாக்கு அளித்து அவரை வெற்றி பெறச் செய்து விட்டார்கள்..இப்போது அவர் முதல்வராகி இருக்கும் வரை..

ஆனால் எம் வீட்டில் உள்ள ஒரு வாயில் காக்கும் பிள்ளையாருக்கு நாங்கள் செல்லாத காசுகளை ஞாபகமாக  5 காசு, 10 காசுகள், 20 காசுகள் 25 காசு, 50 பைசா நாணயம் என அடுக்கி வைத்து விளக்கேற்றி வைத்து வழிபட்டு வருகிறோம்...அவை எல்லாம் செல்லாத காசு செல்லாத நாணயம்...

எனை எனது நெஞ்சார்ந்த நண்பர் ஒருவர் : நீ உஷாராக இரு இல்லாவிட்டால் செல்லாக் காசாகி விடுவாய் என எச்சரிக்கை செய்தார் எனவே நான் இப்போது விடியற்காலம் 4 மணிக்கே அலாரம் வைத்து தூங்கியும் தூங்காமலும்  தூக்கக் கலக்கம் கண்களில் இருந்தாலும் மகனை படிக்க வைக்க கட்டணம் கட்ட ஒரு கல்லூரியில் முகாம் அலுவலராக  இருந்து சேவை செய்து வருகிறேன்






நீண்ட நாள் கழித்து 2 கி.மீ தாண்டி மேட்டூர் அணை காவிரி நீர்த்தேக்கம் சென்றிருந்தேன்...பயம் நெஞ்சை பிசைந்தது....நீர் நிலை கண்களில் நீர் முட்ட ...வழியெங்கும் சுமார் உணவுக் கடைகள் மட்டும் 50க்கும் மேல் புதிதாகத் தோன்றியிருந்தது...உறவுகளும், வீடும், குடும்பமும் அற்ற சூழலில் மனிதர்கள் அதிகமாகி இருப்பதைக் காட்டியது...

சாலை எல்லாம் ஒரே புழுதிகாடாக மாறி இருந்த்து...சாலையோரக் கடையில் ஒரு புத்திசாலி மட்டும் மாஸ்க் அணிந்திருந்தார் ஒர் இருசக்கர வாகன ஓட்டியும்....16 கண்மாய் பாலமருகே பாதாள சாக்கடைப்பணி நகராட்சி சார்பாக நடைபெற்று வருகிறது. கொட்டியிருந்த மணலை ஒரு சிறுவன் சைக்கிள் வைத்து மூட்டைகளில் அள்ளிக் கொண்டிருந்தான். இருட்டு. திருட்டு. என்னைப் பார்த்த உடன் ஏன் பார்க்கிறீர்கள்? எல்லாம் வாங்கி விட்டோம், ஒரு 4 சட்டி போதவில்லை, அதற்காக வாங்க முடியுமா? அவர்களைக் கேட்டோம். என்றான் இது 4 சட்டி இருக்குமா என்றான், அது இருக்குமடா 10 சட்டிக்கும் மேல் என்றேன் கொஞ்ச தூரத்தில் அந்தக் கடையின் வாசல் கட்டுமானப் பணி மும்மரமாக நடந்து கொண்டிருந்தது.



காளி குபேர இலட்சுமி அலங்காரத்தில் இருக்கிறாள் என பார்த்து வரச் சொன்னார் துணைவி....சென்றிருந்தேன், எல்லாம் வணங்கி வழிபட்டனர், அனைவர்க்கும் எலுமிச்சை, பூக்களை காணிக்கையாக கொடுத்துக் கொண்டிருந்த அந்த பூசாரிக் குடும்பம் சார்ந்த அந்த நல்ல தாய் தமது மகனின்( (இளம் காளை போல சரியான உயரம் சரியான நிறம், எடையுள்ள ஒரு வெற்றிடம் ஏற்பட்டிருந்தது) இரண்டு வருடங்களாக அந்த க் கோயிலில் அந்த மகனின் மறைவை எண்ணி என்னிடம் கண்ணீர் சிந்த ஆரம்பித்தார் அந்த தாய்....

மறுபடியும் பூக்கும் வரை
கவிஞர் தணிகை.

குடி நீர்: கவிஞர் தணிகை

குடி நீர்: கவிஞர் தணிகை




16 கன அடி நீர் வருகிறது. 500 கன அடி நீர் குடி நீர்த்தேவைகளுக்காக வெளியே அனுப்பப் படுகிறது. மேட்டூர் அணையில் உள்ள நீரின் கொள்ளளவு 30 அடியாக இருக்கிறது. இந்நிலையில் மாதேஸ்வரன் மலைப் பகுதியில் கசிந்து வரும் காவிரி நீரை தமிழ் மண்ணுக்கு வரவிடாமல் மணல் மூட்டைகள் போடப்பட்டுள்ளதாக செய்திகள்.

ஜல்லிக்காட்டுக்காக போராடி வெற்றி கண்டீர்கள்

ஹைட்ரோ கார்பன் நெடுவாசலில் போராடி வெற்றி காண்கிறீர்கள்

மிகவும் அபாயகரமாக அச்சுறுத்தி வரும் குடி நீர்த் தட்டுப்பாட்டை போக்கக் கோரி தமிழகத்துக்கு நீர் வேண்டி மத்திய மோடி அரசை வலியுறுத்தி ஒரு போராட்டம் அவசியம் தேவைதான் இல்லையே தமிழ் மண் மலடாகி விடும் தூரம் அதிக நாள் தொலைவில் இல்லை.



வெள்ளம் வந்தால் போராடுகிறீர் ஒருங்கிணைந்து, புயல் வந்தால் போராடுகிறீர் யாவற்றுக்கும் நன்றி

ஆனால் வடக்கே கற்பழிப்பு நிகழும்போது அவர்கள் போராடி எழுகிறார்கள்.
நம்மிடையே அந்த நெறி இன்னும் இல்லை

இன்று காவிரி கற்பழிக்கப் பட்டிருக்கிறாள் இன்னும் குடி நீர் இல்லாது இலட்சக்கணக்கில் மக்கள் சாகும்போதுதான் விழித்தெழுவீர்களா?

குற்றவாளிகளும், குற்றவாளி அரசும் அதைப்பற்றி ஒரு சிறிதும் கவலைப்படுவதாகத் தெரியவில்லை

இளைஞர்களே, கல்லூரி மாணவர்களே, பொது மக்களே, தாய்க்குலமே, டாஸ்மாக் கடையை உடைத்து நாம் குடி நீர் தாகம் தீர்த்துக் கொள்ள முடியுமா?

உடனே வீறு கொண்டெழுங்கள் விடை காண....இல்லையேல் நிலை மீறிப் போய்விடும், நீரில்லா மரணங்கள் நிகழும் நாள் வெகு தொலைவில் இல்லை

இயற்கை அருள் செய்யுமா? நமது கிரிக்கெட் அணிக்கு நன்மை செய்வது போல...தமிழகத்துக்கும் அருள் செய்யுமா? என்ன இருந்தாலும் இயறகையை நாளும் நான் வேண்டிக் கொண்டிருக்கிறேன். நீங்களும் வேண்டி பிரார்த்தனை செய்யலாம்.



அது ஒரு பக்கம் இருந்தாலும் நாட்டில் இந்திய நாட்டில் குடிநீராவது சம வாய்ப்புடன் அனைத்து மாநிலங்களுக்கும் விநியோகிக்க அரசை வளைக்க உஙகள் குரலை உயர்த்தி போராட வேண்டியது அவசியம்தான் தோழர்களே...

மறுபடியும் பூக்கும் வரை
கவிஞர் தணிகை.

எமன்: கவிஞர் தணிகை

எமன்: கவிஞர் தணிகை





பொதுவாகவே விஜய் ஆண்டனி என்னும் சிரில் ராஜா அந்தோனி எதையாவது வித்தியாசமாக செய்ய முயற்சிக்கிறார் என்பதை யாவரும் அறிவர். அதில் இந்த எமன் நல்ல கதை அமைப்பு. ஆனால் கொஞ்சம் மெதுவாக ஆமை வேக நகர்த்தலால் ஸ்லோ மோஷன் பிக்சர் போல ஆகிவிடுகிறது . ஆனாலும் நிறைந்த முயற்சிக்காக பார்க்கலாம்.

இவரே இசை அமைத்துள்ளார். இவர் பாடகர் என்பதும் குறிப்பிடத்தக்கது.
இந்தியாவில் , தமிழகத்தில் அரசியல் எவ்வாறு உள்ளது என்பதை திரைச் சித்திரமாக்க முயன்றுள்ளார்.

தந்தை அறிவுடை நம்பியை நயவஞ்சகமாக கொன்றதற்கு காரணமாக இருந்த அரசியல் பிரமுகர்களை இவர் வஞ்சம் தீர்க்கிறார். தியாகராஜன் ஒரு வில்லன்,ஆனால் இந்த அரசியல் கட்சிக்காரர்களிடை நண்பரும் இல்லை, பகைவரும் இல்லை என்ற கொள்கையின் அடிப்படையில் நகர்கிறது எதிரிக்கு எதிரி நண்பர் என்ற கோட்பாடும் இருக்கிறது.

எது எப்படி ஆனாலும் தமிழரசன் என்னும் இந்த படத்தின் எமன், யார் தம் முன் வந்து தம்மைக் கொல்ல முயன்றாலும் இராமாயணக் கதையில் வாலி பாத்திரம் போல பலம் எல்லாம் பெற்று அந்த எதிரிகள் துவம்சம் செய்யப் படுகிறார்கள். சண்டை எல்லாக் காட்சிகளுமே மெதுவாக நகர்கிறது. எதற்காக இப்படி காட்சிபடுத்தினார் என்று விளங்க வில்லை. நன்றாக புரிய வேண்டும் என்பதற்காக செய்திருந்தாலும் அதுவே இந்த படத்துக்கு ஒரு பின்னடைவாக ஆகிவிட்டது





மியா ஜார்ஜ் அழகாக இருக்கிறார்
சங்கிலி முருகன் நல்ல தாத்தாவாக வருகிறார். இறந்து தியாகமும் செய்கிறார், அரசியலில் உடன் இருப்பாரை நம்பாதே....இன்றைய அரசியல் என்றாலே அது கூலிப்படை, நம்பிக்கைத் துரோகம், கொலை, கொள்ளை, திருட்டு எவரையும் தம் சுயலாபத்துக்காக போட்டுத் தள்ளலாம் மேலும் அன்டர் கிரவுண்ட் டான் வாழ்க்கை இவைதான் எனச் சொல்லப்பட்டு சொல்லப்பட்டு தமிழ் படங்கள் யாவும் புளித்து போய்விட்டன. எனவே இந்தப் படம் கூட வித்தியாசமாக சொல்ல முயற்சி செய்யப்பட்டிருப்பினும் நம்மால் முழு நிறைவில் இரசிக்க முடியவில்லை.

நல்ல கதை அமைப்பு இதை மறுப்பதற்கில்லை. சைத்தான் அளவுக்கு மோசமில்லை. பார்க்கலாம்.



நூற்றுக்கு 35 மார்க் கொடுத்து பாஸ் போட்டு விடலாம்.

மறுபடியும் பூக்கும் வரை
கவிஞர் தணிகை.